Lwanj, Lwanj, Lwanj pou Bondye

Prensip, ,

Psst… wi, ou menm menm. Pran yon ti moman, louvre kè’w, respire pwofondeman, epi bay Bondye lwanj! Kòd la kase wi zanmi’m !!!  Itilize Sòm 145 pou ede’w komanse rantre nan atmosfè adorasyon ak lwanj sa jodia.

Sòm 145 vèsyon HCV

« Se yon chante David te ekri pou fè lwanj Bondye.

Bondye mwen, wa mwen, m’a fè konnen jan ou gen pouvwa. M’ap di ou mèsi tout tan tout tan.

Chak jou m’ap di ou mèsi. M’ap fè lwanj ou tout tan tout tan.

Senyè a gen gwo pouvwa, li merite pou yo fè lwanj li vre. Moun p’ap janm fin konprann jan li gen pouvwa!

Papa va fè lwanj ou devan pitit yo pou tou sa ou te fè. Y’a rakonte tout bèl bagay ou fè yo.

M’a rakonte jan ou gen pouvwa, jan ou gen fòs. M’a fè konnen bèl mèvèy ou yo.

 Y’a di jan ou gen pouvwa kifè moun respekte ou. M’a rakonte jan ou gen fòs.

Y’a fè tout moun chonje jan ou gen bon kè. Y’a chante pou ou, paske ou pa nan patipri.

Senyè a gen pitye pou nou. Li gen bon kè. Li pa fasil fè kòlè. Li p’ap janm sispann renmen nou!

 Senyè a bon pou tout moun san patipri. Li gen pitye pou tou sa li fè.

 Senyè, tou sa ou fè ap fè lwanj ou! Tout moun pa ou yo ap di ou mèsi!

Y’a di jan ou gouvènen avèk otorite. Y’a fè konnen jan ou gen pouvwa,

pou tout moun ka konnen jan ou gen fòs, jan ou gouvènen avèk otorite.

 Gouvènman ou lan la pou tout tan. W’ap dominen pou tout tan. Senyè a ap toujou kenbe pawòl li yo, Li bon nan tou sa li fè.

 L’ap soutni tout moun k’ap tonbe. Li bay tout moun ki nan lafliksyon kouraj.

 Senyè, se sou ou tout moun ap gade. Ou ba yo manje lè yo bezwen manje.

Ou louvri men ou, ou bay ni moun, ni bèt, ni plant tou sa yo bezwen.

Senyè a san patipri nan tou sa l’ap fè. Li gen kè sansib nan tou sa l’ap fè.

Senyè a kanpe toupre moun k’ap rele’l, toupre tout moun k’ap rele’l ak tout kè yo.

L’ap bay tout moun ki gen krentif pou li sa yo ta renmen. Li tande lè y’ap rele’l , l’ap delivre yo.

L’ap pwoteje tout moun ki renmen’ l. Men, l’ap detwi tout mechan yo.

 M’a fè lwanj Seyè a ak bouch mwen. Se pou tout moun fè lwanj Bondye ki yon Bondye apa. Se pou yo fè’l tout tan tout tan.”

Amen.

Gen Lafwa nan Fènwa

Prensip lavi, , ,

« A la dous pawòl ou yo dous anba lang mwen! Yo pi dous pase siwo myèl nan bouch mwen. Lòd ou yo fè’m konprann tout bagay, konsa mwen rayi tout bagay ki ka fè’m bay manti. Pawòl ou se yon chandèl ki fè’m wè kote m’ap mete pye’m, se yon limyè k’ap klere chemen mwen.” Sòm 119:3-5

Depil nan nwit epi pa gen limyè swa natirèl ak lalinn lan oswa atifisyèl, majorite mounn pa ka wè anyen. Si’w nan lari, l’ap fasil pou’w ta tonbe nan yon twou oswa fè yon aksidan paske vizyon ou limite. Li fasil pou’w fè nenpòt erè paske vizyon ou limite. Se sa ki rele fènwa.

Gen anpil sikonstans nan lavi kit sou fòm emosyonèl, konplikasyon sante, chomaj, ensekirite, elatriye ka koze gwo fènwa nan lavi’w. Fènwa sa defini kòm yon eta mental e esprityèl ki afekte lajwa, lafwa, lasante, kalite jounen ou pase e li ka menm andanje lavi ou sou anpil fòm tankou depresyon, dout, anxiete, inkredibilite, laprèz, tristès, indiferans, elatriye.

Fènwa pa vini sèlman lè yon bagay pèsonèl rive ou men tou lè w’ap gade injistis, zak vyolans, zak malonèt tankou piyaj, ak vagabondaj ki trakase lespri’w. Gen anpil espri malen ap infliyanse mounn fè mechanste men nan Bondye ou se viktwa. Sa ki enpotan an se konnen kijan pou’w jere’l paske ou ankre idantite’w nan Bondye.

Se pa tout bagay yon mounn ka epanye men paske ou ankre idantite’w nan Kris, ou konnen kote ou asire, ak sonje kiyès ou ye. Ou konnen Senyè a se woche ou. ou se otorite, lespwa, ak lafwa. Ou gen yon amitye ak yon Bondye ki gran e li fidèl. Li enpotan pou ou konnen kijan pou konbat fènwa sou tout fòm.

Moyen ki pi asire a se abiye’w pa lafwa chak jou. Sonje ou gen kontak dirèk ak Bondye e li sensib pou ou. Kenbe banè lafwa ou wo chak jou, chak moman e ankre’w nan pawòl li yo. Medite e reflechi sou moyen ou ka aplike konsèy li yo nan bib la nan lavi’w konsa lè fènwa lavi ta vle fè’w pa wè kote pou mete pye’w ya sevi yon limyè pou klere’w. Bay Bondye lwanj, egzalte non li paske ou konnen li gran e li gen tout pouvwa ak pwisans sou tè sila ak nan syèl la. Tout inivè a sou kontwòl e ou se trezò li.

Kenbe fèm. Pa moli. Kote ou ye, fènwa pa gen plas li paske idantite’w nan Bondye se limyè.  Rete an pozisyon. Wete lògèy, jalouzi, mechanste, move lide etc pou ka tande Bondye pi byen e pwogrese jan li vle’w la.

Kesyon pou’n koze : ki moyen ki efikaz pou ou ilitilize pou kwape fènwa nan lavi’w chak jou? Pataje’l konsa wa beni yon lòt mounn!

Ann Lapriyè : Senyè, mèsi! Mèsi paske ou se limye’m tout kote mwen pase e avè’w mwen pa janm manke anyen. Mèsi paske ou chwazi’m kò’m lamp ou nan kominote’m, lakay mwen, ak tout kote mwen pase pou chwape fèmwa sou tout fòm. Ke non ou beni. Nan non Jezi mwen magnifye’w. Amen.

WILIADEL DENERVIL Feat. FRÈ GABE – ESPWA MWEN (Official Video) – YouTube

Gade yon mèvèy se lanmou!

Prensip, , ,

“Men, lè Bondye fè nou wè jan li gen bon kè, jan li renmen tout moun, li te delivre nou. Li pa t’ delivre nou paske nou te fè kèk bagay ki bon, men paske li menm li te gen pitye pou nou. Li delivre nou lè li lave nou, li voye pouvwa Sentespri li nan nou pou chanje nou nèt, pou n’ te ka viv yon lòt jan. » Tit 3 :4-5

Wi, yo konn di lanmou bay zèl e si lanmou an pa metrize li ka pete fyèl.  Men gen yon lanmou ak yon dòz natirèl ki sèl efè segondè se kè kontan e bon fwi tankou yon pye bwa bò sous dlo k’ap chak jou pouse fèy.

Nan relasyon fi ak gason, Lè mounn yo deklare yo damou,yo fè desizyon pou younn ak lòt mare lavi yo ansanm. Yo ka menm rive deklare se sa mounn sa yo t’ap chache e se ak mounn sa yo vle pwospere tout rès vi yo si tout kondition renmen/relasyon an respekte. Prensip la ankò ki fò nan chwa esperityèl ou paske lanmou sa Bondye gen ou a san limit e se li ki ap chache’w, dòlote’w, e chouchoute’w chak jou. Bondye telman renmen ou ke li vinn sou latè sou fòm Jezikri pou li raple’w ke li bò kote’w tout tan e li renmen ou pou tout tan (Jan 3:15-16).

Kit ou komemore sakrifis Kris te fè sou lakwa ( fèt pak) la jodia nan mwa Avril la oswa ou deside se yon fèt payen, sa ki pi enpòtan an se ke pou’w sonje younn nan distanksyon lafwa disip Kris se lafwa ke li mouri e resisite pou ou ka libere de tout peche ak kondanasyon. Viktwa li sou lanmò raple ou ki li toupwisan e rekonekte ou dirèk ak Bondye.

Viktwa sa sou lanmò bay Sentestespri li aksèdirèk ak ou e li vinn abite andan ou pou li gide’w, transfòme’w, e fasone’w pou’w akonpli tout sa li mande’w pandan w’ap grandi nan lafwa e obeyi li pa lafwa. Gen yon pawòl ki di, “pou’w konn kote’w prale, fòk ou konn kote’w soti ». Se menm prensip sa pou ou dekouvri pwòfondè lanmou Bondye pou ou ak kiyès ou ye, fòk ou konn rakinn ou ki se idantite ou nan Bondye.

Ou fèt nan imaj Bondye ki se lanmou e lanmou sa te menmenl jiska lakwa Golgota pou restore ou ak tout limanite. Kite lanmou sa k’ap koule nan venn ou a plan tout plas li e chouchoute kè’w. Plis w’ap fè experyans ak dekouvri pwofondè lanmou Bondye gen pou ou, plis ou menm tou w’ap damou !

Kesyon pou’n koze : Eske ou kwè Bondye renmen’w ? Ou kwè li damou’s tou ?

Ann Lapriyè : Senyè mèsi paske ou pa sèlman yo Bondye mwen li de grandè ak lanmou li nan liv ki te ekri depi plis ke de mil lane. Wi, mwen rekonesan pou pawòl ou yo nan Bib la e mwen ankò plis fyè e gen kè kontan pou presans ou nan mònn aktyèl mwen. Mèsi pou sakrifis ou sou bwa kalvè pou banm lavi etènèl ak lanmou w’ap simayen nan kèm ak frèm ak sèm yo chak jou. Lanmou sa se sewòm nan kè nou chak e ban nou yon souri ak lapè nan yon mònn boulvèse ke nou pa menm ka explike. Ede nou kite zye nou sou ou pou nou ka grandi nan lafwa pi plis. Nan non Jezi mwen priye ou. Amen.

Omaj pou Mikaben

Prensip, ,

Kit ou kreyen, kit ou se payen gen bagay k’ap toujou frape’w. Gen de zetwal ki file, nou pa ka pa pale’l ni longe dwèt sou li. Lè konpatriot nou tonbe fòk nou pote kole e jou ki sòt pase a individyèlman e kolektivman kòm yon nasyon, Ayiti pran yon lòt gwo frap. Lanmò Mikaben 16 Oktòb nan lavil Paris ak drapo peyi nou sou zepòl li.

Nou te swete sete bri kouri e ke nou t’ap gen privilèj wè Mikaben ankò k’ap souri sou ekran e pote drapo nou ak fyète nan tout sosyete kote li pase.

Mo pa ase pou nou ta exprime tout sa nou santi ak nouvèl lanmò li men nou pa ka rete bèbè. Kou sa fè nou mal tou paske lanmou Mika te pase a travè mizik ak konpòtman li pou Ayiti ak jan li te itilize lang kreyòl pou chante e pataje ide li yo se te tankou lawouze ki konbe sou tè chèch. Se tout sa Bondye mande chak grènn pitit li yo fè.. renmen pwochèn nou e renmen peyi’n pou nou ka pwospere (Jeremi 29:7-11).

MikaBen te obeyi e reprezante tout sa nan fason inik pa li. Li te itilize talan mizikal li ak anpil lanmou e fyète pou li te fè sa konsa li te rive touche e twansfòme anpil lavi mounn e remonte moral anpil Ayisyen a travè melodi li yo.

Mèsi pa sifi pou nou ta diw pou tout sakrifis ou te fè pou remonte fyete tout Ayisyen e ranple nou pou renmen lòt e respekte e renmen peyi nou. Se ak anpil tristès men ak lafwa, menm jan ak Jòb n’ap di: “Bondye bay, Bondye pran. Ke non Bondye beni.” Jòb 1:21.

Gen anpil bagay nou pa konprann e ki fè nou lapènn men nou remèsye Bondye pou privilèj nou te gen pou eksperyanse MikaBen ou de lwen ou prè.

Ke menm Bondye ki te beni nou ak prezans ou, resevwa ou nan bral ak anpil fwete e kè poze. Ke eritaj ou kite a travè non sèlman nan mizik kote ou te toujou raple chak Ayisyen inyon, solidarite, ak lanmou pandan y’ap jwi chak jou men tou nan zèv filantropi ak jantiyès ou te konn fè tout kote ou pase kontinye briye. Ke pitit ou yo ak tout fanmi’w e tout kolòn ou yo jwenn rekònfò e kontinye simayen lanmou tout kote yo pase. Ke nanm ou repoze an pè.

Devosyon an Kreyòl swete kondoleyans ak tout fanmi Mikaben, zanmi, ak fanatik li yo. Ke lapriyè ak lafwa gide nou chak nan moman fènwa sa yo pandan n’ap fixe je nou sou Jezi e kontinye fè li konfyans menm lè nou santi nou twouble.

Kondoleyans sa pataje ak tout yon nasyon ki frape ak anpil sezisman e tristès pandan n’ap lite pou nou aksepte depa brid sou kou ou a nan moman kote peyi nou tou ap pase yon espas ki difisil.

Ke Sentespri ki bay rekònfò, lespwa, fòs, lafwa, kouraj, ak rekònfò pou pitit li yo, rete avèk nou chak pandan n’ap viv evenman difisil konsa yo nan fason kolektif e eprèv individyèl nou yo. Rete nan lafwa e kite je’w sou Bondye. Li toujou bò kote’w nan tout sikonstans.

Nou pran okazyon sa tou pou nou voye anpil onè ak respè pou tout atis ak tout fanm ak gason vanyan nan tout sektè ki ap travay di e itilize talan yo an silans oswa nan je tout piblik la pou yon demen miyò e yon Ayiti ki plen ak lanmou, lespwa, lajwa, ak pwosperite. Mèsi paske ou ap itilize kè ou ak talan yo pou simaye lanmou, respè, lajwa, ak rekonfò tout kote yo ye. Prezans ou ak travay ou yo konte anpil e anpil lavi depann de yo.

Kontinye rete djanm e ankre idantite ou nan Bondye pou lavi ou ka kontinye temayen grandè li tout kote ou pase chak jou ou gen privilèj respire. Pa gen yon ak jantiyès ki janm twò piti. Ke Letènèl kontinye kouvri’w e fè wout avè’w jodia joukaske tout pwomès li yo pou lavi’w manifeste kote ou ye jouk sa kaba. Nan non Jezi; Amen.

Nou pataje ti mizik sa ak anpil rekonesans e lanmou nan memwa Mikaben- yon lejand ki travèse kite mònn nou an e ki make istwa ak kilti peyi nou avèk anpil fyète e lanmou.

Repoze an pè bèl nanm.

Foto sa modifye men kredi a se pou: mikaben-myayiti.com.

Lògèy detwi bonte kè’w

Prensip, , , , ,

“Viv byen yonn ak lòt. Pa kite lògèy moute tèt [ou]. Viv tankou moun ki san pretansyon. Pa kwè [ou] gen pi bon konprann pase sa.” Women 12:16

*modifye pou devosyon an

Diksyonè larousse la defini lògèy kòm yon exagerasyon santiman enpòyans pèsonèl yon mounn genyen pa rapò ak yon lòt nan yon sikonstans byen detèmine.

Santiman lògèy sa ka menmen jalouzi, rankinn, kolè, ak anpil lapènn nan kè mounn ki akimile’l la ak lantouraj li. Lògèy ka fè nenpòt sitiyason parèt entensyonèl e panse tout moun rayi ou. Lògèy ka fè ou gen anpil maladi tankou sik, tansyon, depresyon elatrye paske li gen yon fason li bouyi nan kè yon mounn ki ka detwi bèl nanm andan li an. Sèl objektif li se pou fè tèt li jistis nan tan pal e montre lòt la li siperyè. Men dezi sa yo pa nan amoni ak pawòl Bondye yo paske li mande pou ou pa kite anyen gonfle kè’w (Women 12:16-18).

Lògèy manifeste lè’w konnen idantite’w nan Bondye se padon men ou poko ka aksepte’l.

Younn nan fason pou ou ka konbat lògèy se pou ou pratike genyen yon kè ki gen rekonesans ak remèsiman nan tout sikonstans jan Filipien 4: 4-7 dil la. Note byen se tout sikontans Bib la di sa vle nan tout moman ki bon pou ou yo ak sila yo ki parèt difisil oswa ki ap teste’w. Konsa glwa Bondye a va kontinye briye pi plis nan lavi ou.

Bondye gen anpil bèl mèvey li vle akonpli nan lavi’w e pwomès li yo se lajan sere.

Koze ak Bondye plis lè’w santi’w ofanse, e fè tout efò ou kapab pou ou pa pran desizyon lè ou trè emosyonèl e medite sou sityasyon ki deranje’w la pou ou ka metrize emosyon’w yo avan ou reaji paske ou se lapè.

Kontrèman ak younn nan slogan popilè yo, sa nèg fè nèg Bondye pa ri sa paske li se yon Bondye ki base sou lanmou, padon, respè, kouraj, lafwa, ak lespwa.

Ranplase logèy ak yon kè ki senp e ki ranpli ak lanmou ak padon.

Pwovèb 11:17-19 “Lè ou gen bon kè, se yon byen ou fè pou tèt ou. Men, moun ki san pitye yo, se tèt yo y’ap fè tò. Mechan yo kwè y’ap fè benefis. Men, moun k’ap fè sa ki dwat yo toujou jwenn rekonpans yo. Yon moun ki sòti pou fè sa ki dwat ap toujou viv. Men, moun k’ap chache fè sa ki mal gen pou yo mouri.”
Pwovèb 11:17‭-‬19 HAT98.

Ann Lapriyè:
Senyè mèsi paske ou banm ou kè ki nèt chak jou. Mèsi paske bonte ou nan lavi’m se yon istwa extraòdinè ki ap aprann mwen renmen ou, tèt mwen, ak mounn ki kote’m yo pi plis.

Pa kite’m monte tèt mwen pou lògèy pa bare jem.

Padon pou tout fwa mwen kite emosyon’m yo domine’m. Mwen ofri’w plis plas nan kè’m ak nan panse’m yo jodia pou’m pa gen plas pou lògèy ak rankinn nan kèm konsa glwa ou va manifeste plis nan lavi’m. Nan non Jezi mwen priye’w. Amen.

Kenbe lespwa ak lafwa’w nan Bondye

Prensip

“Sous bonte Senyè a p’ap janm teri. Mizerikòd li poko janm bout. Li renouvle yo chak maten Ala kenbe ou konn kenbe pawòl ou, Senyè!

Mwen di: Se Senyè a ki tout mwen. Se nan li mwen mete tout espwa m. Senyè a bon pou tout moun ki mete konfyans yo nan li, pou moun k’ap konte sou li.” Lamantasyon 3:22‭-‬25 HAT98

Sous bonte Bondye pap janm fini pou ou e pwomès li yo sou lavi’w renouvle chak maten. Souf sa ou leve avèl maten an ki pèmèt ou respire e fòksyone se prèv ke li poko fini avè’w ni fanmi’w ni zanmi’w ak vwazinyaj ou yo li bay menm opòtinite sa yo jodia.

Nan moman difisil sa yo ke peyi an ak anpil nasyon sou tè sila ap travèse, li enpòtan plis ke jamè pou ankre idantite’w nan Bondye plis. Pou’w abiye’w pa lafwa e mete nan krann tèt ou tout pwomès Bondye gen pou ou paske lavi ou pa yon aksidan e ou se respons ak lapriyè yon moun.

Raple’w kiyès Bondye w’ap sèvi a ye.
Raple’w mèvèy li te fè nan lavi’w ak fanmi’w ayè, e kite je’w louvri pou sa l’ap fè nan moman sila a.
Raple’w ki mounn ou ye.
Raple’w ke lavi’w pa yon aksidan.
Raple’w Sentespri li akonpanye’w tout kote ou ye e li la pou gide’w, konsele’w, dirije’w, ak pwoteje’w. Eske ou ba li plas poul fè sa jodia?

Bondye pa janm sispans goumen pou ou e pwoteje’w. Medite ankò sou Lamentasyon 3:22-25 ki raple ou de konpasyon Bondye sou lavi ou. Ke Sentespri’l ba ou plis bon konprann pandan w’ap reli’l.

“Sous bonte Senyè a p’ap janm teri. Mizerikòd li poko janm bout. Li renouvle yo chak maten Ala kenbe ou konn kenbe pawòl ou, Senyè!

Mwen di: Se Senyè a ki tout mwen. Se nan li mwen mete tout espwa m. Senyè a bon pou tout moun ki mete konfyans yo nan li, pou moun k’ap konte sou li.

Lamantasyon 3:22‭-‬25 HAT98″

An koze: kisa sa vle di pou ou ke mizerikòd Bondye yo pa fini nan lavi’w jodia? Ekri nou nan komantè a!

Ann Lapriyè: Senyè, mèsi pou gras ou ak konpasyon ou gen pou nou chak. Mèsi pou prezans ak lanmou ou gen pou nou. Mèsi pou gado lavi sa. Lavi paske ou gen kontwòl tout aspè lavi mwen, katye, vil, ak peyi kote m’ap viv la. Menmm si tout bagay ta parèt mwa ou pwomèt mwen. Menmm jan ak Jeremi ke nanm mwen mete tout lespwa’l nan ou paske ou se sous tout bonte e mwen konnen ou pa janm pèdi pwose. Mwen kwè nan ou e mwen glorifye’w. Nan non Jezi mwen priye’w. Amen.”

Ankouraje yon lòt mounn jodia e pataje devosyon an ak yon lòt mounn! Ansanm nou pi fò!

Pèsevere nan lapriyè

Idantite, , ,

“Ann pwoche bò kote Bondye ak tout kè nou, ak yon konfyans byen chita, san nou pa gen anyen nan kè nou ki pou boulvèse konsyans nou, kò nou menm byen netwaye nan yon dlo byen pwòp. Ann kenbe espwa nou genyen an byen fèm. Paske, nou mèt sèten, Bondye ap kenbe pwomès li.”Ebre 10:22‭-‬23 HAT98

Bondye toujou kenbe pwomès li e bib la chaje temwanyaj anpil fanm ak gason ke Bondye te itilize pou raple chak jenerasyon de lanmou, prezans, ak grandè li. Eske Bondye ka itilize’w pou chanjman li vle fè nan jenerasyon ou an? Nan zòn ou ak peyi w’ap viv la? Eske ou kwè ou se viktwa e ou pote viktwa tout kote ou pase?


Nan moman sila kote mòn nan chaje pwoblèm, ensekirite ap monte pye toupatou, epidemi, ak estrès ta vle fè chak mounn al kache e chape pye yo si yo kapab (men nanpwen). Men nou menm ki ankre idantite nou nan Bondye, sekirite nou se nan li pandan nap pratike prekosyon ak bon konprann, nou gen devwa pou pwoklame pawòl li yo ak pwomès li yo nan tout sikonstans menm lè nou pa toujou konprann sa k’ap pase yo.


Lapriyè se aksè’w 24/7 ak Bondye. Itilize’l pou envite Sentespri nan tout sa w’ap fè e w’ap andire. Sekirite se eritaj ou nan Bondye menm jan ak lasante, lapè, ak lajwa tou (nan tout sikonstans). Pa kite anyen gonfle kèw. Pandan w’ap deklare pawòl Bondye e kwè y’ap manifeste nan lavi ou ak pa fanmi ou, pa bliye ou gen devwa pou ou deklare yo e priye pou peyi’w, katye’w, ak zòn kote ou pase yo (Jeremi 29:7).

Lavi ou nan de pla men Bondye e ou pa yon aksidan. Lenmi nanm ou djòb li se pou li fè ou kwè kontrè a pou ou ka panike, dekouraje, e abandone.


Gen yon istwa nan 2 Makabe 1:10-17 nan pati bib la yo rele Apokrifa a kote yo tap rakonte lanmò wa Antiok ki te yon wa ki te chaje lanbisyon ak move lide. Istwa sa raple ke Bondye pa janm pèdi pwose e mechan yo toujou mouri anba move zak y’ap fè.


Bondye w’ap sèvi a tout pwisan e se li ki toujou gen denye mo. Kite je’w sou li e pèsevere nan lapriyè pandan w’ap abiye’w pa lafwa e obeyi fè tout sa li mande’w nan ti moman ou pase koze ak li yo.

Kwè e wa va wè grandè li manifeste!

Ou se yon mounn extraòdinè e lafwa’w ak pèseverans ou nan Jezikri ap fè’w djanm e pote chanjman k’ap dire nan lavi’w, fanmi’w, ak antouraj ou. Jan pawòl granmounn yo di a, ” se lè li pral jou li pi fènwa.” Deliverans pa’w, pa fanmi’w ak peyi Ayiti pre rive. Kontinye envite wayòm Bondye a pou li manifeste sou tè sila a ak nan tout sikonstans sa yi.  Pèsevere nan lapriyè ak lafwa.

Ann Lapriyè:
Mèsi paske ou se fòs ak pwoteksyon ou ban mwen tout kote mwen pase. Mèsi paske nan ou mwen pa manke anyen. Ba mwen fòs, kouraj, ak plis pasyans poum pa dekouraje ni desespere pou lavi’m ka temwanye grandè ou pou lòt jenerazon ka sonje jan ou renmen chak pitit ou e jan ou fidèl e mèveye. Mwen ba ou glwa ak lwanj ou menm sèl merite. Nan non Jezi mwen priye’w. Amen.


https://youtu.be/b15WiUppftk


https://youtu.be/m5LC9zFk0bo