LEVE!

Prensip lavi, , ,

Wi, jodia se jou pou ou L.E.V.E!

Louwe Bondye pou mèvèy li yo nan lavi’w
Eleve vwa ou pou ba li tout glwa ak konpliman li merite
Vanse ak kè kontan paske Bondye restore’w
Egzalte non li pou mirak li ap opere ak kado lavi

Ou gen lavi, w’ap respire alòs olye pou’w plenyen deside jodia se jou’w pou ou gen lajwa nan tout sikonstans. Wi, souke kò’w!

W’ap chachè yon mèvèy? Ou ta renmen Bondye fè yon mirak nan lavi’w? Leve, gade nan yon miwa wap wè yon reflè. Ou sipri? Se ou!! Ou se mèvèy la, ou se mirak la, e Bondye kreye’w pou ou se repons lapriyè o mwens yon mounn kote’w e sa ap afekte anpil nasyon sou tè sila. Sa, w’ap tann??LEVE zanmi’m. Kontinye adore e vanse pou pi devan. Lavi ou twò enpontan pou ou kite dout paralize’w.

Ann medite ansanm sou Ezayi 51:17-23

” Leve non, lavil Jerizalèm! Leve non! Souke kò ou. Leve non! Ou fin bwè gode chatiman Bondye te ba ou bwè nan kòlè li a. Ou bwè dènye degout ki te nan gode a jouk li fè tèt ou vire!

Nanpwen yonn nan tout pitit li fè yo ki la pou moutre’l chemen pou l pran. Pa gen yonn nan tout pitit li elve yo ki la pou ba l men.

De malè tonbe sou ou yonn dèyè lòt. Ki moun ki ka plenn sò ou? Yo ravaje peyi a, yo fini avè li. Grangou ak lagè fin detwi moun yo. Ki moun ki ka konsole ou?

Nan tout kwen lari, moun ou yo kouche atè san konesans. Tankou bèt nan bwa, yo pran nan pèlen. Kòlè Senyè a fè yo sou. Bondye pa nan pale mete la.

Se poutèt sa, nou menm, moun lavil Jerizalèm ki nan soufrans, koute pawòl sa yo byen, Koute yo, nou menm ki sou tankou si nou te bwè.

Senyè a, Bondye nou an, pale. Men sa Bondye k’ap pran defans pèp li a di: — Mwen pral wete nan men nou gode mwen te ban nou bwè nan kòlè mwen an. Nou p’ap gen pou nou bwè ankò nan gode k’ap fè nou sou a.

M’pral mete gode a nan men moun ki t’ap maltrete nou yo, moun ki t’ap di nou yo: Plat atè non pou nou pase. Lè sa a, se do ou ki te sèvi chemen. Se do ou ki te sèvi lari.”

Ann Lapriyè: Mèsi Senyè!!! Mèsi pa sifi pou’m temanye grandè ak gantiyès ou nan lavi’m. Mèsi paske ou ban mwen fòs poum LEVE e temanye. Mwen sou kont ou e se sak fè kè’m pap sote nan tout sikonstans ou la pou mwen e ou la avèm. Mwen ba ou lwanj ak konpliman ou menm sèl merite. Ke non ou ak volonte ou egzalte nan lavim al toupatou sou tè sila. Ou extraòdinè e mwen renmew ak tout kè’m. Kontinye fè travay nan mwen, pirife’m, sanktife’m, e gide’m poum mache dwat devan ou e lavim sèvi temwanyaj grandè ak pwisans ou tout kote mwen pase. Nan non Jezi. Amen!

Bondye se sous kouraj ou

Prensip lavi, , ,

Yon sous se yon kote ki gen abondans yon bagay patikilye. Li ka tanporè oswa pèmanen. Nan tout sous ki egziste tankou sous dlo, sous petwòl, elatriye se sèl Bondye ki gen pwovizyon san limit. Pou chak pitit li yo, tankou ou menm, li vle ba yo abondans nan tout bagay (Sòm 34:10) e jodia li vle raple’w ke sous kouraj ou (kote ou ka vrèman rechaje’w 100 % pou ou vanse pou pi devan an nan tout sikontans lavi) se nan li.

Sonje younn nan karakteristik idantite’w nan Bondye se kouraj. Kouraj pou vanse nan lafwa kit nan lajwa ou nan lapènn. Kouraj pou kontinye fè sa ki bon e kwè ke pwomès Bondye yo sou lavi’w ap akonpli paske ou nan pla men li e li renmen’w ak yon lanmou san mezi. Kouraj pou ou kontinye pwoklame grandè li ak volonte li nan tout sikonstans.

Pwoche pi pre tròn li e louvri kè’w panda w’ap medite sou Ezayi 51:12-16. Kite nan’m ou beni.

Ezayi 51: 12-16

“Senyè a di: — Se mwen menm k’ap ban nou kouray. Poukisa pou nou ta pè moun ki la pou mouri, moun ki gen pou pase tankou zèb nan savann?

Gen lè ou bliye Senyè ki te fè ou la, li menm ki te louvri syèl la epi ki te poze fondasyon latè a? Poukisa tout lajounen w’ap tranble konsa devan kòlè moun k’ap peze ou yo, moun k’ap chache detwi ou yo? Kisa kòlè moun sa yo ka fè ou?

Talè konsa, yo pral lage moun ki nan prizon yo. Yo p’ap mouri nan kacho. Y’a toujou jwenn dekwa pou yo manje.

Se mwen menm, Senyè a, ki Bondye ou la. Mwen souke dlo lanmè a, mwen fè lanm lanmè yo gwonde. Senyè ki gen tout pouvwa a, se konsa yo rele m!

Mwen konfye ou pawòl mwen, W’ap jwenn pwoteksyon anba zèl mwen, M’ap fè yon syèl nouvo, m’ap fè yon tè tou nèf. M’ap di [Ayisyen]*: Ou se pèp mwen.”

* modifye pou devosyon an

Ann Lapriyè: Senyè mèsi pou gras ou ak konpasyon ou ki pa janm vini. Mèsi paske ou chwazi’m pou fè pati pèp ou. E ou toujou la pou gide’m. Mwen konfyem nan tout pawòl ou yo paske ou se yon Bondye fidèl ki sansib pou mwen. Mèsi pou pwoteksyon’w ak kouraj ou ban mwen chak you. Ede’m rete pi pre’w chak jou. Aktive pwisans ou nan mwen plis pou’m kenbe jis sa kaba e simayen lanmou ak lajwa tout kote mwen paske ou se sous tout sa mwen genyen. Mwen konfye’m nan ou. Amen.

Ankourajman Bondye pou ou jodia:

Idantite, Prensip lavi, , , , ,

Ezayi 51:1‭-8, vèsyon HAT98

” Men sa Senyè a di: — Nou tout ki dèyè delivrans lan, nou tout k’ap chache Senyè a, chonje rasin kote nou soti, chonje ki pyebwa nou ye!

Chonje Abraram, zansèt nou an, ak Sara, manman ki fè nou an! Lè m te rele Abraram, li pat gen pitit. Mwen beni’l, mwen ba li anpil pitit.

Mwen menm Senyè a, mwen pral gen pitye pou peyi [Ayiti]* an, pou tout moun k’ap viv nan kay kraze li yo.

M’ap fè tout dezè li yo tounen jaden Edenn, m’ap fè tout savann li yo vin jaden Letènèl. Se kè kontan, se fèt ase ki va gen la. Y’a chante, y’a fè mizik pou di m mèsi.

Mwen p’ap mize vin sove nou. Talè konsa m’ap delivre nou. Se mwen menm ki pral gouvènen nasyon yo. Moun ki sou zile yo ap tann mwen vini, y’ap tann mwen vin delivre yo.

Nou menm pèp mwen, koute sa m’ap di nou: Nou menm, nasyon yo, louvri zòrèy nou byen louvri! Paske m’ap anseye prensip ki dwat, y’a sèvi gid pou nasyon yo.

Leve je nou gade syèl la! Voye je gade latè! Syèl la pral disparèt tankou lafimen. Latè pral fini tankou yon vye rad. Moun ki rete sou latè pral mouri tankou mouch. Men, delivrans m’ap ba yo a ap la pou tout tan. Mwen p’ap janm bezwen delivre yo ankò apre sa.

Nou menm ki konnen sa ki dwat, koute sa m’ap di nou. Nou menm k’ap mache selon kòmandman mwen yo, nou pa bezwen pè lè moun ap trennen nou nan labou. Nou pa bezwen tranble lè moun ap joure nou.

Moun sa yo pral disparèt tankou rad sizo ap devore. Yo pral fini tankou twal kanni. Men delivrans m’ap ban nou an ap la pou tout tan. Pitit pitit nou yo p’ap janm nan ka pou mwen delivre yo ankò.”

*Modifye pou devosyon an

Ann Lapriyè: Lwanj pou ou granmèt mwen! Mèsi pou pawòl ou yo ki plis ke lò, plis ke lajan sere. Yo se rekonfò ak sous lavi mwen. Mwen konnen tout pwomès ou yo se wi ak Amen. Mwen konte sou ou ak tout pwomès ou fèm yo nan Bib la. Kontinye fè travay ou nan mwen e nan kè ak travè chak grenn pitit ou yo pou patou pou ou non kontinye glorifye. Amen.

Senyè a se fòs ou

Prensip, Prensip lavi, , ,

« Ala renmen mwen renmen ou, Senyè! Se ou menm ki tout fòs mwen. Se ou menm ki twou wòch kote’ m kache a. Se ou menm ki sèvi’m ranpa. Se ou menm ki delivre’ m. Ou se Bondye mwen, se ou menm ki pwoteje’m. Se nan ou mwen mete tout konfyans mwen. Se ou ki tout defans mwen. Se fòs ou k’ap sove’ m. Se anba zèl ou mwen jwenn kote pou’m kache. » Sòm 18 :1-3

Lè ou pase ti tan plis nan kontanple gwandè Bondye, w’ap siprann tèt ou nan mitan lavi chè, insekirite, depresyon, lagè, ak move nouvèl k’ap sikile yo e ak lafwa w’ap deklare e reklame tout pwomès li yo nan lavi’w. paske ou konnen kiyès ou ye e konprann pouvwa Lesentepri nan ou (1 Korint 6:19). Ou se yon mounn chwazi alò double fòs e deklare :

 “Mwen santi’m gen fòs paske Senyè a se gadò mwen. Mwen pa manke anyen paske li menm ki provide tout sa mwen bezwen. Mwen se yon èt presye nan zye Bondye e mwen represante’l sou tè a.

Sak pi mèveye a se ke kreatè syèl ak tè a konnen mwen pa non e li damou’m ankò plis se sak fè chak jou l’ap revele’m plis sou li, sou wayòm li, e sou bi precis li voye’m sou tè sila nan moman.

Mwen pote yon repons pou jenerasyon mwen an. Lavi mwen pa yon askidan e mwen konnen pawòl li toujou akonpli. Mèsi pou lanmou san limit sa ou genyen pou mwen Senyè “. Amen

Pran swen tèt ou

Prensip lavi, , ,

“Se sak fè, frè’ m yo, jan Bondye fè nou wè li gen kè sansib pou nou an, se pou nou ofri tout kò nou ba li tankou ofrann bèt yo mete apa pou Bondye, bèt yo ofri tou vivan epi k’ap fè Bondye plezi. Se sèl jan nou dwe sèvi Bondye tout bon.” Woman 12 :1

Pou’w ka akonpli tout sa Bondye voye’w sou tè sila pou’w akonpli eh byen..fòk ou la e fòk ou an bon eta (fizikman, mantalman, e emosyonèlman). Devan tout demann lavi ki parèt san fen, li pa toujou fasil pou dirije tan’w e sonje pou priorize tèt ou ak sante’w. Estrès fè yon mounn neglije anpil ti aksyon ki nesesè pou ou viv byen tankou bliye manje e manke domi ki ka vinn devlope anpil maladi. Se sak fè fòk ou sonje pran ti tan pou ou de tan an tan.

 “Pran swen tèt ou” se yon nan konsèy anpil mounn bay lot ak anpil lanmou. Se yon ti konsèy pa toujou fasil poum fè e byen konprann men li nesesè. Chak mounn defini mèyè “swen” sa a fason pa yo. Gen pou demounn sa vle di fè zong yo ak cheve yo, ale nan cinema, achte si achte sa. Pou yon lòt li ka vle di ale nan voyaj lòt kote elatriye. Tèt ou inkli kò’w, nanm ou, ak lespri ou paske ou se yon mounn konplè alò tout sa yo bon men sonje avan tou pran swen andedan’w menm jan ou pran aparans ou serye. Men kèk rapèl/konsèy nan Bib la pou ede’w pran ti tan pou ou rechaje’w pi souvan e respeke tamp (kò ou) ke Bondye prete’w la.

  1. Veye lide ki nan tèt ou yo. Pwovèb 3:24 “veye panse k’ap pase nan lespri’w yo” paske negativite afekte sante nan yon nivo ke ou ka menm rive fè gwo maladi paske li vini ak anpil lòt estrès. Fil 4:6-7

2. Pran yon jou nan semèn nan pou repoze e rekonekte pi plis ak Bondye, ak tèt ou, e kominote ou tou (sa ki rele “sabbath” ). Pratike yon jou repo kote ou ka dekonekte de travay ou e rekonekte ak Bondye nan yon fason pi entim,ansanm ak zanmi fanmi  ki kote ou yo pou raple yo jan yo enpòtan pou ou. Egzòd 20:8-11. Ou pa bezwen al nan deba relijye si Sabbath a sipoze Samdi, Dimanch, oswa Mèkredi. Mete jenou’w atè epi koze ak Bondye pou’l montre’w ki jou ou menm ka pran pou’w fè sa paske li konnen bien tout responsabilite’w yo, kiyès ou ye, ak kisa ou bezwen.

3. Oganize tan’w ak jan pou jere sante’w. Ekri yon orè pou ou manje ak domi chak jou. Manje manje ki gen bon vitamin e ki pa gen anpil pwodwi chimik paske sa ap aji sou kalite panse ki nan tèt ou. Woman 14 :20-22

4. Lapriyè. Priye lè’w santi nivo estrès ou ap ogmante pou mande Bondye estrategi pou simonte sityasyon devan’w lan. Priye tou lè kè ou nan lajwa pou di li mèsi. Ou ka kenbe yon priyè jounal pou ou ka ekri mèvèy Bondye avè’w  e sonje priyè li reponn yo ak kijan li te fè’l. 1 Tes 5 : 16-18 ; Matt 11 :28-30 ; 2 Tim 1 :7 ;  1 Pyè 5 :7-9

5. Fè espò—sil le fo jwenn yon kamarad pou ou fè espò avè’l. Woman 12 :1 ; 1 Tim. 4:8; 5:2 ; 1 Korint 3 :16

6. Dekonsantre lespri’w. Pratike ekri nan jounal panse entim ou yo oswa rekorde nan odio pou’w ka plis familiarize’w ak jan ou reflechi e sa’w santi. Oswa fè yon aktivite kreatif tankou reve ankò, jwe mizik, pentire, aprann yon lòt lang elatriye. Jan 14:27

7. Chache sipò. Kenbe zanmi ak fanmi ou fè anpil konfyans pre paske apre Bondye yo se sipòw. Mande èd lè’w nan bezwen e fikse je’w so usa ki devan’w lan sèlman (Pwov 4 :25-27). Ou pa bezwen viv tankou sipèewo e vle fè tout bagay pou kòw. Ou fè pati yon fanmi e gen plis mounn ki vle ede’w ke’w realize. Reziste. Pwovèb 18:24, 27:17; Galat 6:10

8. Soti deyò al mache! Wi pase ti tan nan lanati pou rekonekte ak bèl kreyati Bondye tout lew kapab. Ose 6:6

9. Investi nan ou. Aprann konnen kiyès ou ye re, talan ou yo, devlopke karakte’w, ak nivo pwofesyonèl ou tou. Konsa wa va aprann renmen tèt ou plis e rete onèt ak tèt ou. Pa bay tèt ou manti lèw pa santi’w byen. Pwov 28 :20. Ou vanyan. Dekouvri’w!

10. Pratike silans ak chwazi mo ou yo le w’ap pale oswa ap dekri yon sityasyon. Matye 12 :36-37 ; Ebre 12 :1-2

11. Ri a lavi e visite fanmiw ak zaniw tout o tan ou kapab paske yo fe pati richès ou.

12. Ede lòt mounn ki kote’w yo vanse e pran tan pou respire entansyonèlman pou kèk minit de tan an tan Fil 2:4; Jan 13:34

Kesyon pou’n koze: ki lot konsèy nan Bib la ou jwenn sou swen tèt ou?

Ann Lapriyè: Senyè, montre’m kijan pou’w pran swen tèt mwen pou’m ofri tout mwen menm ak ou chak ou pi plis. Mwen konfyenm nan ou Jezi. Amen.

Jezi va pran swen Mwen _ Stanley Georges ( Amen Wi ) best Haitian gospel songs 2020 praise & worship – YouTube

Sanktifye kè’w pou ranje eskanp figi’w

Prensip lavi, , ,

“O Bondye, pa kite okenn move lide nan kè’m. Mete bon lide nan tèt mwen, pou’m sa kenbe fèm.” Sòm 51 :10

Defwa se jan’w panse a ak mentalite ou kiltive yo ki anpeche’w pwogrese e deveni mounn Bondye kreye’w pou’w ye a. Pozisyon kè’w ki vle di kalite lide ki nan tèt ou ak kantite kwayans ou gen nan lide sa yo afekte jan ou viv chak jou. Pwovèb 4 :23 di « Pase tout lòt bagay, veye byen lide k’ap travay nan tèt ou, paske se yo k’ap di ou ki jan pou ou viv. »

Gen anpil fwa ou wè pwogrè ou ta renmen fè yo poko realize malgré efò ou yo. Ou fè tout lapriyè ou konnen, jene, swiv tout konsèy, epi ou poko wè anyen mache jan ou ta renmen e mande Bondye a. Rive yon lè ou ka santi’w friste. Lè konsa ou fè figi’w plen vèn epi kat minn mare nan fronw menm lè w’ap wi. Ou ka menm komanse panse Bondye bliye’w oswa sa w’ap fè a pa nan volonte’l. Petèt wi, men gen yon aspè ki souvan neglije se pozisyon kè’w. Sa vle di eske sa w’ap mande Bondye a soti nan bon racinn nan kè’w? Lè’l reponn ou konbyen lavi mounn k’ap chanje?

Anpil panse negatif, egocentric, epi ki plen ak anvi, mank padon, konfyans nan kapacite’w, oswa ak jalouzi ki anpeche’w vanse e afkte benediksyon Bondye nan lavi’w. Jak 4:6-8 raple ou ke “[…] Bondye pran pozisyon kont moun ki gen lògèy yo. Men, moun ki soumèt devan’ l, li ba yo favè li. Se poutèt sa, desann [ou]* devan Bondye. Men, pran pozisyon kont Satan, la kouri kite [ou]*. Pwoche bò kot Bondye, Bondye va pwoche bò kote [ou]* tou. [ou]* menm k’ap fè peche, lave men [ou]*. Netwaye kè [ou]*, [ou]* menm k’ap woule de bò . « 

Se sak fè li enpòtan pou’w mande Bondye sonde kè’w de an tan pou’w ka kontinye mache nan viktwa li ba ou a menm jan ak David nan Sòm 51:10. Ankre idantite’w pi fon nan Bondye pou’w ka konnen vrè valè’w konsa Sentespri a ede’w. 

Netòye kè’w ak pase ti tan nan pawòl li yo nan Bib la, koze ak li, epi kite’l revele’w sekrè li yo pou ou (Jeremi 29 :10-14).

Netòye lespri’w pa ranple panse negatif yo ak pwomès li sou lavi’w. Sanktifye (pirifye) nanm ou pa fè experyans ak li, vinn selektif nan tout sa w’ap tande (mizik, tip pwèch yo, fim elatriye) konsa lafwa ou va ogmante e w’ap devni tout sa li te kreye’w pou ou ye a.

Jodia pran yon ti tan pa ou poze e koze ak Bondye. Retire tout sa k’ap gonfle kè’w yo e mete yo anba zèl li e menm jan jak David nan Sòm 51:10 mande li pou netòye’w, pirifye’w, e santifye kè’w konsa figi’w ap vinn radian an jwa. Tankou yon patalon twal ki byen lave ak byen repase, eskanp figi’w ap vinn dwat e reflekte tout bote andedan’w yo e lavi’w ap temwanye grandè li pi plis tout kote’w pase avan pandan w’ap kwape satan ak tout zèv malen li yo.

Kesyon pou’n koze: Ki jan de lide ou wè ki pi gwo anpèchman ou pou ou pwogrese?

*adapte ou devosyon an

Ann Lapriyè : Senyè, mwen ba ou pèmisyon pou ou antre nan fon kèm. Analize’m,vire’m, e tounen’m jan ou vle. Wete tout sa ki nan mwen ki pa an akò ak vizyon ou yo pou lavi’m. Olye poum fè tout sa mwen vle, mwen vle fè volonte’w pito. Pirifye kèm, nann mwen, ak lave lesprim de tout negativite, panse egoyist, rankinn, lògèy, jazouli, kè di, dout, idolatri nan tout fòm, tristès, laperèz, e menm peche kache ke mwen menm m pa vreman konnen. Retire tout move lide ak move pwojè ki ta cache nan mwen tou. Gide’m, sankifye’m, e itilize’m pou glwa ou plis chak jou. Mèsi deske ou chwazim e renmenm pou fè gwo mèvey sa yo pou mwen. Amen.

FASONEM JANW VLE James S. Alcindor – YouTube

Egzalte non Bondye

Prensip, , , ,

“Bondye, mwen pare, wi, mwen pare. Mwen pral chante, mwen pral fè lwanj ou.  M’ap souke kò mwen, m’ap leve. M’ap pran gita mwen, m’ap pran bandjo mwen. Mwen pral fè solèy leve! Senyè, m’a fè lwanj ou nan mitan pèp yo! M’a chante pou ou nan mitan tout nasyon yo! Ou renmen nou anpil anpil, ou toujou kenbe pawòl ou. « Sòm 57 :8-10

Egzalte non Bondye vle di ba li kompliman, lwanj, ochan, ak admirasyon li menm sèl li merite. Se yon privilèj pou exalte non Bondye nan tout sikonstans. Sa montre ou rekonesan  men tou ke ou fè Bondye konfyans paske ou konnen li se lanmou e nan li ou pap janm manke anyen (Sòm 23 ; 34 :10). Younn nan fòm nou egzalte non Bondye se nan lapriyè ak lwanj. Pa bliye yo fè pati defans djanm ou genyen.

Yon lòt fason ou egzalte non Bondye se nan atitid ou fas ak lavi e nan kompòtman ou. Jan ou renmen tèt ou ak lòt mounn, padone, e kalite panse ki nan tèt ou yo tou. Fason ou wè tèt ou dwe egzalte non Bondye tou paske li di nan pawòl li nan Jan 13 :34-35 « Men, m’ap ban [ou]* yon kòmandman nouvo: Se pou [ou]* yonn renmen lòt. Wi, se pou [ou]* yonn renmen lòt menm jan mwen renmen [ou]* an. Si [ou]* yonn renmen lòt, lè sa a tout moun va konnen se disip mwen [ou]* ye. »

 Bondye fidèl e li toujou la pou ou. Chak souf ou respire tenmwanye jan li gen pouvwa e jan li vle manisfeste lanmou li ak travè ou menm. Dispoze kè’w e louvri bra’w pou recevwa lanmou li a pi plis e simanyen’l tout kote’w pase pandan w’ap ba li glwa ak lonè li merite non sèlman ak bouch ou men tou ak tout kè’w, nanm ou, lespri ou, ak jan ou konpòte kò ou. Egzalte li. Raple nanm ou jan li gran konsa wa kontinye grandi nan lafwa.

Kesyon pou’n koze : kisa ou realize ki anpachew egzalte non Bondye ? Sonje nou se yon fanmi ki ap grandi ansanm alòs ou pa bezwen pè komante pou ou pataje lide ansanm.

*adapte ou devosyon an

Ann Lapriyè : Papa, mèsi paske ou toujou la pou mwen chak jou. Kit m’ap rejwi, kit mwen kagou, fidelite’w pa janm lagem. Mèsi pou sa.  Mèsi tou pou lavi, lasante, pawòl ou yo, Sentespri’w ki toujou la. Mèsi pou sekirite ou ban mwen nan tout sikonstans. Mèsi pou fanmi menm yo ak zanmi ou ban mwen tout kote mwen pase. Mwen egzalte’w ak tout kè’m, nan’n mwen, lesprim, panse’m, ak tout kò’m. Mwen fè lwanj ou. Mwen ba ou tout lonè, ak konpliman ou merite pou jan ou gen bon kè. Ou pa janm lage pitit ou yo malgré nou pa toujou fè sa ki dwat devan je’w. Kontinye fè travay ou nan mwen Senyè. Amen.