“Se mwen menm ki fè latè a, ki ba li fòm, ki kenbe’l nan plas li. Se mwen menm yo rele Senyè a. Men sa mwen di: Rele’m, m’a reponn ou. M’a fè ou konnen yon bann gwo bagay, yon bann mèvèy ou pa’t janm konnen. Wi, men sa mwen menm, Senyè a, Bondye pèp [Ayisyen]* la, mwen di sou kay lavil [tout pwovens]* yo, sou kay wa peyi [Ayiti]*yo, ki fin kraze paske moun Babilòn yo sènen lavil la, y’ap atake’l.” (Jeremi 33:2-4)
Nan moman difisil koulyea kote anpil nan nou ta vle pedi lespwa pou peyi nou chanje, fòk nou sonje kilès nou ye. Viris a gòch, lavi chè ak ensekirite a dwat, pwoblèm pèsonèl nan mitan, chalè solèy anlè, traka anba, li fasil e nomal pou nou santi nou lou. Nou santi nou ta kite sa pa vre? Non! Okontrè se kounyea pou nou kanpe e kenbe djanm nan idantite nou nan Bondye tankou lafwa ak entegrite.
Fòk nou sonje nou menm ki kwè nan Kris, idantite nou se lanmou, pasyans, pèseverans, lasante, otorite, richès, libète, ak lespwa. Nou se ajan chanjman e nou dwe fe devwa nou. Nou dwe panse pou peyi nou vanse. Se nou menm ki majorite a, fòk nou kolabore. Nou pa ka bese lè bwa ni mete tout fòs nou nan chache mwayen pou nou lage pye nou kay vwazen oswa nan bato oswa nan fò papye pou lage pye nou. Tout kote gen difikilte pa’l e se mounn ki ladan’l yo ki kanpe pou chanjman menm jan nou menm tou ka kanpe pou chanjman lakay. Respekte idantite nou kom lafwa, viktwa, epi onore talan Bondye ba nou yo pou sèvis li. Si nou pa kenbe e reve anko, kouman n’ap fè gen yon demen miyò?
Si nou di nou kwè nan Kris menm chak jou n’ap di lavi nou ap pi tris kijan n’ap fè wè chanjman e patisipe pou chanjman sa fèt? Si nou pa mete jenou nou atè e rele Bondye pandan n’ap mande’l li direksyon pou nou ka fè devwa nou kòm sitwayen tè sa kote li ba nou eritaj depi nou fèt, kiyès ki pral pote chanjman pou nou? Si apre nou lapriyè nou pa komanse fè pati solisyon an nan pwopte, panse, kolabore, mete biznis lokal ki soti nan entegrite e ede younn ak lòt, e kanpe pou lajistis ak lanmou kijan n’ap fe vanse?
Kit ou gen 1 an oswa 95 an, kelkeswa jenerasyon ou fèt la nou tout konsènen. Nan Jeremi 33:2-4, Bondye fè nou pwomès depi nou rele’l, l’ap reponn nou e montre nou bagay nou dwe fè. Ann rele li ansanm pou Ayiti e komanse chanje mantalite nou younn ak lòt. Ann kite ipokrit kote ak bouch nou n’ap di yon bagay e nan kè nou n’ap doute (Jak 1:5-8, 4:3-8; Matye 6:24).
Konsa, na aji ak yon sèl kè, yon sèl lafwa, epi jwenn rezilta n’ap chache a. Anpil mounn ap tann leta, men nou menm ki ankre idantite nou nan Bondye dwe diferan paske Bondye ba nou otorite deja e se devwa nou pou nou pote chanjman pozitif tout kote nou ye. Ann reveye santiman ak konsyans nou paske Bondye pat janm ba nou tout talan, aksè dirèk ak li nan lapriyè, ak konesans sa yo pou ou mache tèt bese.
Kote abyiman nou? E pa n’ap mache tankou mounn ki tou touni e san mèt?
Nou se mounn chwazi. Bagay sa yo pa pou nou ankò. Baton nou nan men nou (ki se pawòl Bondye a, lapriyè, ak konnen dwa ak devwa’n kòm sitoyen). Poukisa n’ap kite chen ap jape’n konsa epi n’ap kouri pou n’ale kache mete sou li?
Difikilte ap toujou la men Bondye pwomèt nou viktwa ak prezans li chak jou (Jan 16:33; 1 Pyè 4:12-16; Matye 28:20; Ezayi 43:2). Se pa paske tout mounn ap di bagay negatif sou peyi a ak plonje nan desespwa ki vle di yo verite ni pou nou fè sa tou. Sonje mo nou chwazi yo reflèkte reyalite nou viv la.
Ann mete fòs nou ansanm pou nou entèsede pou peyi nou paski fiti nou ak pwogrè nou depann de kote nou n’ap viv la (Jeremi 29:7-9). Pandan nou ap lapriyè, mande Bondye pou li montre nou chak kijan nou ka e dwe fè pati chanjman sa paske ansanm nou pi fò.
Ann reveye kè ak konsyans nou pou nou di ase! Zèb la pa pi fre kay vwazen oswa nan lòt peyi. Ann sispann kite lenmi nanm nou fè devan pòt nou tounen dèyè kay e vle fè nou abandone. Non! Nou pa ka fè bak ni jodia ni demen. Bondye twò renmen nou e li twò gran e twò pwisan pou li ba nou otorite ak konesans sa yo pou nou mache tankou pitimi san gadò e kite peyi nou tankou jaden san mèt pou nenpòt bèt vini jwe lago ladann lè yo vle.
Menm si ou pa ta ap viv Ayiti kounyea ou konsènen tou paske Bondye te ba ou privilèj pou yon Ayisyen (swa pa san oswa pa relasyon) pou yon bi byen detèmine. Mete men’w nan pak la ak jenou ou yo tou pa lafwa pou ou beni peyi a ak fè pati chanjman an. Nou tout ka e gen devwa pou nou fè yon diferans ak kado lavi sa Bondye ba nou pa sèlman nan fanmi nou men nan peyi nou tou. Priye pou kote ou ye a men sitou priye pou Ayiti tou. Nenpòt kote’w yo nan mònn nan kounyea pran yon ti moman pou ou pouse dè kri de viktwa e fè lwanj pou Bondye paske benediksyon li yo anvayi Ayiti. Apre, fè yon aksyon k’ap menmen nou nan yon demen miyò. Se pa sèlman lè’w voye yon ti chocho lakay ou ka ede, ou chaje ak talan ou ka itilize pou nan ankadre, ak fotifye lòt yo tou. Itilize yo. Nou tout se yon sèl fanmi e lapriyè ak efò nou chak konte.
Konba sou konba, viktwa se pou nou nan non Jezi! Nou se limyè e se nou ki pou briye. Nou paka rete bwa krase e Bondye pa janm kreye nou san misyon. Alò ann deklare benidiksyon Bondye sou peyi sa pou fòs fenwa yo tonbe. Deklare padon, limye, kouraj, lespwa, lajwa, lafwa, lanmou, ak inite sou tè nou an e vizyon ak akomplisman plan Bondye yo sou li . Konsa tou, ann fè ti pati pa nou nan pwopte ak kreye.
Si nou mete tèt ansanm n’ap rive pi lwen! Kretyen wi, nou pakab (Fil 4:13). Ann pwopte, netoye kay ak zòn nou, konstwi ansanm, fe sekirite younn pou lòt. Ann plante kafe, kann pou nou fè zik, aprann resikle fatra pou nou fè atizana ak lòt bèl bagay, vann ak achte epis lakay, sik, kola, diri latibonit, mango ak fwi nan si, pistach, etc. Nou ka rekonstwi ekonomi lokal la e sispann achte nan peyi lòt mounn tout sa nou bezwen. Nou ka chanje figi Ayiti paske nou pa pou kont nou. Se pou nou tout ak peyi nou reyisi nan non Jezi! Sekirite se eritaj nou nan Bondye e fok sou kole zepòl pou kwape move je nan mitan nou tou.
Legiz se mwen, legliz se ou, legliz se nou. Legliz se otorite Kris la sou tè sila e ou se yon anbasadè lapè ak anpil viktwa nan li. Fè devwa’w nkòm sa dwa. Sonje kiyès ou ye jodia e sonje chanjman k’ap dire soti nan Bondye—fòk ou fè ti pati pa’w la tou e deklare an tout kè, nanm, ak fòs ou :
“AYITI OU BENI! Tout depatman nan peyi a: nò, sid, lès, lwès, nòdès, nòdwès, sidès, sidwès, lagrandans, nippes, plato central ak tout awondisman, komin, ak seksyon kominal ki ladann yo beni nan non Jezi. Tout dirijan yo beni nan non Jezi e ke yo mache nan krent Bondye. Kote ki gen mechanste lave ak san Jezi e koripsyon detwi paske krent ak lanmou Bondye ap anvayi kè chak pitit tè beni sila nan non Jezi!! Glwa Bondye manifeste nan chak fanmi ak zanmitay. Ke sekirite, lanmou, inite, travay manifeste kounyea pou izinn ak pwodiksyon lokal miltiplye nan tout zòn pou mounn jwenn manje, e edikasyon chak sitoyen fèt pou chak mounn akonpli misyon Bondye pou li sou tè sila.
Tout pitit Bondye reveye! Nou kanpe pou lajistis, lanmou, respè, edikasyon, lasante, ak pwopte. Nan non Jezi fanmi mwen yo beni tou, travay mwen beni e si’m poko jwenn younn favè Bondye sou mwen. Tout pòt ki fèmen yo pou bloke pwogrèm louvri jodia. Katye mwen an beni, zòn mwen an beni, lavil kote’m ye a beni, e tout kote’m pase beni nan non Jezi! Peyi mwen beni e tout fòs fè nwa peri nan moman sila.
Mwen se yon mounn chwazi e lavi mwen nan pla men Bondye. Menm favè ak benediksyon sa sou peyi’m tou. Se pou li kanpe e deklare mèvèy Bondye.
Ensekirite ak move konsyans peri kounyea menm e fanm ak gason vayan Bondye yo lakay blende ak fòs ak kouraj pou kanpe pou lajistis ak lapè nan non Jezi.
Mwen deklare inyon nan kout kè, lespri ak tout nann chak grenn Ayisyen lakay ak patou nan lemònn nan lanmou ak lafwa pou chanjman fèt. Ke Legliz Kris la fotifye nan moman sa.
Mwen mande’w tou pasyans pandan w’ap repònn priyè sila e ak kouraj pou’m fè ti pati pam nan e ranpli devwa m kòm sitoyen.
Satan se ou m’ap kwape sou tè beni sa. Ase. Ou pèdi batay la deja sispann fè grimas pou fè pitit wa dè wa yo pè. Mwen pran plas mwen jodia kòm sentinel pou kè’m, fanmi’m, zanmi’m, ak peyi mwen pou glwa Bondye manifeste pa pouvwa Lesprisen.
Jodia se yon jou ki ranpli ak benediksyon e mwen deklare reyisit peyi’m, katye mwen, lavil yi ak tout kote pitit Bondye yo reyini, tèt mwen, ak tout fanmi mwen yo tou nan non Jezi!
Ayiti ou beni e ou pral mache de viktwa an viktwa paske san Jezi te koule pou ou tou pou’w ka viv nan libète. VITKWA!! Glwa!!! Alleluia!!! Amen.”
Ann kontinye deklare lapriyè sa ak pwomès Bondye sou lavi nou ak peyi a chak jou. Pa fè bak. Sonje se lè li pral jou, fènwa parèt pi rèd. Avni peyi nou ak fiti nou depann de nou. Nou gen responsabilite pou nou kanbe. Ann mare senti nou e kite Lesentespri gide nou pou nou ka wè mèvèy li fè yo pandan nou vivan an. Mwen konte sou ou, e tisè, frè, kouzen, kouzinn, matant, tonton, grann, paran ak anpil rès fanmi ou yo konte sou ou tou pou ou fè pati kokenn chènn priyè sa e revolisyon konsyans sa a ak nou.
Ann frape lenmi nanm nou an nan kote ki pou fèl mal tou sou jenou nou pandan n’ap koute direksyon Bondye pou nou fè pati chanjman. Ann fè lenmi pwogrè Ayiti a konnen, Jezi se wa sou Ayiti e si li sèl ki gouvènen e gen tout pouvwa sou li pou li sispann boulvèse’n e lakòz deblozay lakay nou non Jezi.
Kretyen, wi ansanm nou kapab. Ann sere kole.
Medite tou sou: 1 Kwonik 7:14; Ezayi 60:1-3; 1 Tim 2:1-5; Danyel 2:20-21; Women 13:1; Matye 6:1-9
“Kenbe. Kanpe. Pa lage. Ayiti ou beni!”
Kretyen nou kapab!!!