Tag Archives: Bondye

Lapriyè: Senyè Gide’m

Prensip, , ,

 « Senyè, montre’m jan pou’ m swiv lòd ou yo, pou’m obeyi yo jouk sa kaba. Ban’m lespri pou’m ka obeyi lalwa ou, pou’m fè sa’l mande a ak tout kè mwen. Fè’m viv yon jan ki dakò ak kòmandman ou yo, paske se nan yo mwen jwenn tout plezi’ m. Fè’m pi anvi swiv prensip ou yo pase pou’m anvi gen lajan. Pa kite’ m kouri dèyè bagay ki pa vo anyen. Fè’m swiv chemen ou mete devan’ m lan. » Sòm 119 :33-37

Genyen bon direksyon enpòtan nan chak pa lavi. Tankou si ou ap itilize yon navigatè pou ale kay yon zanmi e ou mete yon adrès ki diferan de kote ou vle ale a, ou ap ka fè anpil tan nan wout men ou pap janm rive wè mounn sa. Menm jan tou, si ou manke tande vwa Bondye byen pou lavi, ou ka fè anpil aktivite ki ka menmen chagren ki pat nan plan li pou ou. Sitou pou ou ki ankre idantite’w nan Bondye, li necesè pou tande vwa li klè nan tout sikonstans pou ou ka pwogrese ak sajès, strateji, ak bon konprann nan tout sa ou ap fè.

Idantite’w nan Bondye se younn nan pi gwo richès ou genyen. Distraksyon lavi a goch adwat, ka twouble ou de tan an tan. Se sak fè de tan zan tan li necesè pou ou pran yon ti moman pou ou re-evalye relasyon ou ak Bondye, deccisyon ou yo, e mande li direksyon pou asire’w ke wout w’ap fè yo nan volonte’l pou ou.

Jodia kit ou santi ou wè klè tankou dlo kokoye san ma oswa ou ap viv nan dout, enkyetid, konfizyon, oswa dekourajman, pran yon ti tan pou medite sou Sòm 119:33-37 pou envite Bondye nan koze‘w paske se sèl li ki ka sèvi’w kamyonèt pou tout okasyon.

Ann Lapriyè

Papa mwen ki nan syèl la,

Mèsi pou lanmou ou ak prezans ou ki san limit. Mèsi pou pwoteksyon ak gras ou ki kouvri mwen ak chak grènn pitit ou yo chak jou.


Mèsi pou konpasyon ak devouman ou pou nou chak. Se yon lanmou mwen pa toujou konprann men ki bay lavi mwen yon lòt sans e ki ranpli mwen ak anpil esperans.

Mèsi pou pawòl ou yo nan Bib la ki pou sèvi’m kòm gid, pou Sentespri ou ki enspire sa pou’m priye ak ki direksyon pou’m pran lè’m bezwen yon papa ki pou proteje’m, yon zanmi ki pou kote’yon .

Nan bouyon lavi’m ou se sèl magi ki ba li pi bon gou.

Ou se tout sa mwen genyen e nan ou mwen pa janm manke anyen. Mwen vle viv plis selon volonte’w e fè tout sa ki bon devan zye’w ak lezòm pou glwa ou eklate tout kote’m pase.

Mwen pa vle viv selon emosyon mwen ni kontinye reaji chak lè sikonstans lavi ba mwen tap. Nenpòt kote mwen ye, mwen konnen ou se sponsò ki toujou ban mwen bourad. Gide mwen souple.

Pa kite’m fè desizyon ki pap fè ou plezi ni pou .avi fè’m vann eritaj mwen pou ti pen. Proteje kè’m e kenbe mwen nan pye’w. Tankou ti katkat ki poko ka mache byen paran yo toujou kenbe mwen yo pou fè wout la, mwen ofri men ak pye pam yo. Mennen’m kote ou vle.

Ou se yon Bondye ki jis e ki gen kè sansib. Nenpòt desizyon ou fè ak direksyon ou bay yo ap korèk. Tout sa ou di ak bouch ou men ou toujou akonpli li. Mwen konnen mwen ka konte sou ou je fèmen.

Se poutèt sa, mwen vle fixe je’m sou ou e mache nan chemen ou trase devan’m nan. Mwen vle reyisi jan ou menm ou te ekri nan destine’m.

Di mwen kisa ou vle’m fè nan sezon sa. Mwen disponib pou ou, Senyè. Fè’m genyen tout konba sou fòs fenwa ki vle fè gè sou lavi’m ak lantouraj mwen.

Ke chak grenn pitit, fanmi, zanmi, ak kolòn mwen yo jwenn yon nouvèl realizasyon de idantite yo nan ou kòm pitit ou e nouvo direksyon tout nèf de ou de sa yo dwe fè pou glwa ou nan sezon sa. Gide nou souple. Mwen konte sou ou. Nan non Jezi, Amen.

Please enable JavaScript in your browser to complete this form.

Bondye ap konbat pou ou

Idantite, Prensip lavi, , , , ,

” Kounyeya, mwen konnen Senyè a ap fè moun li chwazi a genyen batay la. Li rete nan syèl la, nan kay ki pou li a, li reponn li. Li fè’l genyen batay la avèk gwo pouvwa li. Gen moun ki mete konfyans yo nan machin pou fè lagè. Gen lòt moun, se nan chwal yo yo mete konfyans yo. Men nou menm, se nan pouvwa Senyè a, Bondye nou an, nou mete konfyans nou.” Sòm 20:6‭-‬7 HAT98

Nan lagè, kapitèn solda yo toujou gen yon plan pou yo ka genyen batay la sou lenmi an. Yo toujou gen yon plan atak, defans ak ofans paske yo konnen yon sèl strateji pap garanti yo viktwa. Konsa tou nan koze idantite’w, toujou gen yon gè se pa younn ou ka toujou wè men Bondye ap konbat pou ou (Efez 6:12-13). Kelkeswa kote’w ye, zye li toujou fixe sou ou paske li renmen’w san mezi (Efez 3:18).

Konba sa l’ap menmen pou ou a ka parèt sou anpil fòm ak sezon lavi. Pa egzamp, gen de lè nan lavi ou ka santi ou nan tèt mòn, kote tout sa ou dezire manifeste, ou santi koneksyon’w ak Bondye pi pre ke jamè. Se komsi lapriyè ou se ou sèlman yo t’ap tann ou ouvi bouch ou pou yo egzose. Se fèt nèt al kole. Nan tout ti moman damou’w ak Bondye, li revele’w pa Sentespri li anpil mistè kache e anpil fwa li avèti’w tou lè ou menm oswa yon lòt an danje li vle chanje rezilta yo pa lapriyè. Nan moman sa yo se flè sèlman ak lanmou k’ap simayen.

Gen de moman tou ou ka santi’w nan yon vale ki pafwa ka tèlman fon li menm difisil pou ou exprime kijan ou santi’w. Ou ka menm santi li tankou yon siklòn ki deside pote lavalas dlo yon sèl kou pou pote’w ale. Nouvèl agoch adwat e responsabilite lavi sanble pa konprann sak rele “yon ti poz komèsyal” la pandan emosyon ou yo sèlman vle fè skandal. Sa yo poko rive’w? Menm si yo poko rive’w, yo ka rive yon mounn ou konnen.

Tout experyans tèt mòn oswa vale lavi fè pati egzistans la. Yon bagay ki senten se chanjman. Chanjman fè pati lavi toulèjou. Ou paka nye li ni pèl paske chak jou ak sezon vini ak gou pa yo (Eklesias 3:1; Matye 6:34). Chanjman w’ap tann nan soti nan ou paske ou se chanjman men se Bondye sèl ki pote chanjman ki ka dire.

Anpil mounn ka kwè sou fos ponyèt yo pou soti nan tout sitiyasyon men ou men ou konnen sous ou e konba w’ap menmen an pa yon gè natirèl sèlman. Ou konnen kapitèn lame ki gen plis experyans ak strateji ke tout lot yo ap konbat pou ou. Letènèl ap konbat pou ou sa vle di li toujou ap pouse fòs tenèb pou li restore lajwa, sante mantal, fizik, esperityèl, sosyal, ak finansyè ou ak fanmi ou(Sòm 20:6-7).

Se pou ou toujou fè tout sa ou kapab pou ou mete ou an pozisyon pou recevwa benediksyon ak opòtinite li ofri ou yo pou grandi. Mèt syèl la ak tè a nan wou, rele sou men’w, byen abiye pa lafwa, e mete’w fre (Som 24:1;Galat 2:20). Mete sandal ou anba ke’w, sentiwon’w nan ren’w (kouraj ou), manto lajistis ou, ak kas sali ou nan tèt ou paske ou pa nan won (diferan sikonstans lavi) san baton (san defans).

Bondye gen kontwòl tout aspè nan lavi’w. Li gen plan atak, defans, ak ofans pou li ede ou reyisi. Atake enemi nanm ou ak dout ou yo nan lapriyè. Konfronte pè ou ak pawòl Bondye yo paske yo se defans ou. Sentespri ap ba ou plan ofans la moman pa moman. Konte sou li. Kenbe je’w sou Jezi. Li pap janm kite ou wont.

Ann Lapriyè

Senyè, mèsi paske ou pa janm kite mwen sèl. Ou se kapitèn lame pa excelans. Mèsi paske w’ap konbat pou mwen. Mwen remèt tout fado, jwa, rev, plan, entansyon mwen yo, fanmi’m, katye’m, vil kote’m rete, ak peyi ya nan men’w. Mwen konnen avèk ou mwen toujou pote viktwa. Mwen konte sou ou. Amen.

Please enable JavaScript in your browser to complete this form.

Kwayans ou se reyalite’w

Idantite, Prensip, Prensip lavi, , , , ,

Jezi antre andan yon kay, avèg yo antre dèyè’l. Jezi mande yo: “Èske nou kwè’m ka fè nou wè ankò?” Yo reponn li: “Wi, Senyè.” Jezi touche je yo, epi li di yo: “Tout bagay ap pase jan nou kwè’l la.” Mat 9:28‭-‬29 Vèsyon Kreyòl Fasil (VKF)

Kwayans ou se baz lafwa ak konsyans ou. Li manifeste nan panse, mo ou chwazi yo, ak aksyon ou yo tou. Gen yon slogan popilè ki di, “jan ou wè’l la se konsa li ye”. Konsèp sa soti nan yon kwayans ke mònn fizik la se sèl reyalite ki egziste e se sikontans ki ap gouvemen paske “jan bagay yo ye se konsa y’ap ye”. Mantalite sa lakòz anpil mounn pa wè tèt yo kòm yo patisipan aktif ki pou pote chanjman nan divès aspè nan lavi ak enviwonman yo. Tout responsibilite vinn tonbe sou yon lòt antite tankou yon òganizasyon èd lokal oswa entènasyonal , lòt mounn yo konnen tankou fanmi ak zanmi ke yo kwè ki nan pi bon sitiyasyon pase yo, ofisye gouvènman peyi kote yo ye, elatriye.

Ou menm ki ankre idantite ou nan Jezi-Kris, reyalite pa ou a diferan e li plis ke sa je natirèl ou yo ka wè (Efèz 6: 12). Pa pouvwa Sentespri ki nan ou, viktwa ou asire depi ou envite’l nan koze a, e fixe je’w sou ou li.

Mo ou chwazi itilize ak desizyon ou pran nan chak sitiyasyon temwanye de kalite konfyans ou genyen nan Bondye ak nan tèt ou (potansyèl li ba ou yo) vre.

Ou se sèl ak limyè. Siksè ak reyisit ou (jan bib la ak ou menm defini li) depann de ou men yo depann de sikonstans ou yo menm lè pafwa yo ka maske kò tankou gwo zotobre pou fè ou pè. Lè w’ap travèse moman sa yo pa dekouraje. Pèsevere ak pasyans ak detèminasyon pito. Mande Bondye pou louvri je’w e ba ou bon konprann pou ou ka wè byen e jere sitiyasyon sa yo nan yon manyè ki reflekte kiyès ou ye.

Ou gen otorite sou tè sila a e ou se yon ajan chanjman (Lik 10:19-21; 2 Tim 1:7). Sa vle di rezilta nan lavi ou ak enviwònman ou yo depann de jan ou egzèse lafwa ou nan chak sikonstans. Lafwa ou se defans ou ki fè kwayans ou se reyalite’w (Matye 9:29; 17:20; 21:21; Ebre 11:6; 1 Korent 2:5).

Ou se youn mounn chwazi pou egzèse otorite Bondye ba ou nan yon viktwa ke li gentan genyen deja depi rezireksyon li sou bwa kalvè. Deklare ak lafwa ke jodia sa se jou delivrans ou e tan gouvènay Bondye nan travè lavi ou ap pwogrese an gran jan. Kwè! Wi, fòk ou kwè paske lavi anpil mounn ak lòt kreati depann de ou e y’ap tann ou(Women 8:19). LEVE. Se pou ou domine sou tout sityasyon pou glwa Bondye.

Fèmen je’w e louvri kè ou. Tande vwa Jezi-Kri ki ap di ou menm jan li te di avèg la: “Tout bagay ap pase jan [ou]* kwè’l la.” Matye 9:29.

Refleksyon:

  1. Jezi di tout bagay ap pase jan ou kwè li a. Kijan ou “kwè’l”?
  2. Kijan ou kwè fiti ou pral ye? Ki kalite objektif ou genyen pou lavi ou, peyi ou ak wayòm Bondye? Ki plan ou genyen an plas pou realize yo?
  3. Eske ou kwè vre ou gen kapasite ak otorite pou chanje tèt ou, kay ou, katye, ak peyi ou? Si wi poukisa? Si non poukisa?

Ann Lapriyè:

Bondye mèsi pou lanmou enfini ou genyen pou mwen ak chak grenn pitit ou yo. Banm sajès ak bon konprann ou pou mwen avanse wayom ou a pati de lavi mwen. Fè mwen wè reyalite mwen yo a travè de ou e non pa de konesans mwen ki limite. Ou se yon Bondye san limit e ou omnisyan. Mèsi pou prezans ak konpasyon ou.

Reyalite’m chanje depi lè mwen te fè desizyon pou’m aksepte apèl ou e idantite’m kòm pitit ou. Mèsi paske ou chwazi’m, konnen’m, renmen’m, dòlote’m, e toujou avè’m depi avan mwen respire sou tè sa e ou pa janm lage’m yon jou.

Jodia mwen pran responsabilite mwen sou tè sila pou mwen domine sou tout domènn ou ban mwen. Mwen renonse ak tout dout ak kwayans ki pa soti nan ou ak enspirasyon ou nan Bib la. Kote lafwa mwen fèb, tanpri fòtifye’m pou mwen pote fwi paske tout dezi kè’m se pou glwa ou eklate sou tout fas tè a e nan lavi chak grenn pitit ou. Ban mwen fòs pou mwen domine chak sezon. Chak sezon se pa’m paske ou toujou avèk mwen. Ke volonte ou akonpli nan lavi mwen menm jan li fèt nan syèl la. Amen.

Please enable JavaScript in your browser to complete this form.

Bondye renmen ou

Prensip, Prensip lavi, ,

“Men, Bondye sitèlman gen kè sansib, li sitèlman renmen [ou], Li ban [ou] lavi nan Kris la, [ou]* menm ki t’ap viv nan lanmò akoz peche [ou]. Se yon favè Bondye fè [ou]* lè li delivre [ou]. […] Li fè tou sa pou moutre pou tout tan ki gen pou vini yo jan li renmen [ou]* anpil anpil, jan li aji byen avèk [ou]* nan Jezikri. Se paske li renmen [ou]* kifè li delivre [ou]*, [ou] menm ki mete konfyans [ou] nan li. Sa pa sòti nan nou menm menm, se yon kado Bondye ban [ou]. Non, [ou] pa fè anyen pou sa. Konsa, pèsonn pa ka vante tèt yo.”
Efezyen 2:4‭-‬9

Jodia kit ou retrouve’w nan mònn oswa vale nan etap lavi ou, sonje ke Bondye renmen’w ak yon lanmou san mezi ki pa gen kondisyon ni egcepsyon. Lèt lanmou li pou ou toujou o prezan, dirèk, ak yon garanti pou lavi. Ou se ti chouchou wa inivè a. Eske ou kwè sa?

Anpil fwa gen sikonstans ak teoloji ki ta ka vle fè ou kwè fòk ou ta toujou ap fè yon bagay oswa pote yon chay Bondye pat ba ou pou ou ka demontre ou se disip Jezi Kris. Fòk lavi ou ta tèl jan oswa pou ou ta pale yon lòt lang, rete yon lòt katye oswa peyi, abiye yon lòt mòd elatriye pou ou ka jwenn favè ak lanmou Bondye men realite a pi senp. Bondye renmen ou jan ou ye a. Lavi ou nan pla men li e li vle grandi zanmitay li ak ou. Ah wi, li damou’w e pa gen anyen ki ka anpeche li kontinye renmen ou (1 Jan 4:15-18; Eza 43:3-4; Efez 2:4-9).

Lè ou santi w’ap bite e lanmou sa ta sanble lwen, se pa emosyon li yo ki chanje pou ou. Dòz lanmou li pou ou soti nan yon sous infini e li ouvri kè li ba ou san resèv ni repwòch. Sèlman pran yon ti tan pou sonje kiyès ou ye. Si w’ap plenyen, ranplase yo pa lapriyè. Abiye’w pa lafwa e mande Bondye pou louvri je ak kè ou pou ou resevwa lanmou gratis ti cheri sa ak de pla men ou.

Kounyea menm, pran yon ti moman pou fèmen je si ou kapab epi mete men sou kè’ w. Repete ak yon sèl kè: ” Bondye renmen’m ak yon lanmou san repwòch. Li aksepte mwen san kondisyon e li damou mwen nan mezi. Wi, mwen se ti chouchou Wa syèl ak tè a e li vle kiltive yon relasyon entim e sensè ak mwen chak moman. Mwen gen anpil valè. Ak lanmou sa Bondye kouvri’m nan, mwen menm tou mwen se lanmou”.

Apre pran yon ti poz pou reflechi ak deklarasyon veridik sa ou sòt fè a. Eske ou kwè? Si ou jwenn dout nan kè’w pa enkyete’w. Se yon bon moman pou ou mande Sentespri pou revele’w rezon yo pou ou ka afemi lafwa e benyen nan lanmou sa nèt alkole. Nenpòt kote ou ye Bondye renmen’w e ou se lanmou.

Benediksyon:

” M’ap mande Bondye pou li ban [ou]*, dapre richès pouvwa li a, fòs ak kouray nan kè [ou], pa mwayen pouvwa Sentespri a, pou [ou] ka grandi nan karaktè [ou],

pou Kris la rete nan kè nou ak konfyans nou gen nan li a. M’ap mande Bondye pou [ou] pouse rasin, pou [ou] chita byen fèm nan renmen,

pou [ou] ka konprann, ansanm ak tout pèp Bondye a, jan renmen Kris la laj, jan li long, jan li fon, jan li wo.

Wi, mwen mande pou [ou] rive konnen kalite renmen Kris la gen pou [ou], atout pèsonn p’ap janm ka rive konnen l nèt. Konsa, n’a vin plen nèt ak tou sa ki nan Bondye.” Amen. Efezyen 3:16-19 vèsyon HAT98 * adapte pou devosyon an

Lapriyè: Senyè fè mwen wè

Idantite, Prensip, , , ,

Senyè, pawòl ou yo fè mwen konprann ke je mwen yo se lanp kò a (Matye 6:22-23). Yo explike tou san vizyon pitit ou yo ap peri (Pwovèb 29:18). Se sak fè mwen ap mande ou pou louvri je’m pou mwen ka wè ou pi byen.
Menm jan ou te fè pou avèg la wè nan Matye 10 51-52, Mak 8;22-25, Jan 9:1-12.
Ou te repònn Eli lè li te priye pou Elize te wè (2 Wa 6:17-20),
Repònn kri kè’m pou mwen wè jodia.

Ban’m vizon’w.
Ban’m pasyon’w.
Mwen remèt ou kè’m ak dezi mwen yo.
Mwen vle toujou viv nan volonte’w.

Lèt lanmou ou pou mwen toujou o prezan e li pa janm chanje. Mwen se ti chouchou’w chak jou menm lè pafwa mwen sèvi ak ou tankou etranje. Retire tout sa nan mwen ki ka fè vizyòn’m flou,
Pou mwen pa kouri tankou machinn ki gen move kaoutchou.


Montre mwen tout sa ki ka oswa ki ap fè’m mache bite,
E lave mwen de tout move lide ki ka fè’m doute e pase kalamite. Mo mwen gen anpil pouvwa pou kreye realite’m, Sanktifye kè ak bouch mwen pou mwen ka itilize yo ak repè.

Ou menm Bondye se ou sè ki se sous kouraj mwen.
Ede mwen fokis sou ou pou’m wè ou ak sikonstans lavi nan tout klète. Ede mwen padone epi reve anko pou mwen reponn apèl ou ak obeyisans ak gete.
Mwen vle reyisi simayen lanmou ak lajwa ou tout kote mwen pase.


Mèsi pou prezans ou nan lavi mwen e mizerikod ou ki pa janm fini. Mèsi pou vizyon ak idantite mwen w’ap restore ak yon lanmou infini. Remèsiman, lwanj, egzaltasyon pou ou ki se sèl wa pou tout tan. Ke entimite ak amitye grandi pi plis tankou Moiz pou lavi mwen temanye entegrite, kreativite, prezans, grandè ou nan jenerasyon jodi yo ak tout sa ki gen pou vini pa pouvwa Sentespri ou. Amen.

Louvri je’w pou ou konprann idantite’w

Prensip, , , , ,

” Je ou se lanp kò ou. Si je ou nan bon eta, tout kò ou nan limyè. Men, si je ou nan move eta, tout kò ou nan fènwa. Se sa ki fè si limyè ki andan ou la se fènwa li ye, se pa ti fè nwa anndan ou fè nwa.” Matye 6:22‭-‬23 HAT98

Je oswa zye (jan kèk mounn ekri’l) nan kò ou enpòtan pou fònksyone byen. Jan Matye 6: 22-23 explike, yo sèvi kòm limyè pou klere pye’w. Yo se younn nan bousòl ki pou ede oriante ou tout kote ou pase. Yo ajoute yon gou patikilyè nan lavi chak jou tankou sèl. Yo ka sinyale danje, konekte ak lòt mounn pou pataje emosyon ak experyans, pran plezi admire mèvèy lavi, elatriye. Se sak fè lè je yon mounn gen pwoblèm sa ka vini yon gwo endikap ak danje pou mounn sa ak sila yo ki nan antouraj li tou.

Menm jan je nan kò ou nesesè pou nan bon eta konsa tou “je” esperityèl ou ki fè pati entegral idantite’w nan Bondye dwe fonksyone byen. Se yo ki ap fasilite’w pou ou wè sa je natirèl ou yo pa gen kapasite pou montre’w. Efezyen 6:12 raple ou menm ki ankre idantite ou nan JeziKri gen yon konba espesyal, “Paske, se pa ak moun [ou]* gen pou [ou]* goumen. Men, se ak move lespri ki nan syèl la, ak chèf, ak pouvwa, ak otorite k’ap gouvènen nan fènwa ki sou latè a”. Se yo ki ap ede ou wè tèt ou, enviwònman kote’w ye, ak sikonstans ou yo nan pèspektif etènèl Bondye (Jeremi 29:17).

Lè “je” espirityèl ou yo louvri ou ap wè klè (Matye 6:22, Pwov 21:2; 23:17) e rantre nan yon lòt dimansyon entimite ak Bondye. Konsa lavi ou va tenmanwe pwisans ak otorite li e viv nan abondans li te kreye an avans pou ou ak sosyete kote ou ap viv la (Jeremi 29: 4-7; 11-14). Se sak fè li enpòtan pou ou abiye’w pa lafwa nan chak moman pou ou kapab viv nan otorite, viktwa, lajwa, entegrite, jenerozite, sajès ak bon konprann ou genyen kòm eritaj nan Bondye.

Kenbe “je” ou yo nan bon eta vle di pou ou fè tout efò ou kapab pou ou pa kite lògèy, rankinn, regrè, laperèz, ak move lide gonfle kè ou (Pwovèb 4:23). Koze ap Bondye souvan pou li ka ede ou egzaminen kè’w e sanktifye ou . Le sa “je’w” yo va sèvi ou tankou yon antènn sou tèt yon bèl mònn byen wo ki resevwa bon signal pou ou konprann e konnen byen vit lè se Sentespri Bondye ki ap gide ou oswa pwòp dezi ou yo k’ap mennen’w nan nenpòt chemen.

Ke Bondye louvri je ou yo e kenbe yo fixe sou li pou ou ka wè tout opòtinite li mete sou wout ou. Ke li ba ou fòs ak kouraj pou ou ranmase yo ak bra louvri. Se pou ou pèsevere, reve, rete vanyan, e ankre idantite’w nan JeziKris pi plis chak jou pou simayen lanmou ak limyè li tout kote ou pase.

Ann Lapriyè:

Bondye mèsi paske ou kreye je natirèl ak esperityèl mwen yo pou ede’m grandi nan yon lot dimansyon avè’w. Louvri je’m yo pou’m ka wè ou pi byen ak chak moman e pote lanmou ou, lapè, lajwa, ak padon tout kote mwen pase. Korije tout vizyon ki pa korèk e banm linèt ou lè nesesè. Mwen soumèt tout nann mwen, kòm, lespri, dezi, ak emosyon mwen yo nan men’w pou mwen devni yon pwa lou pou wayòm ou chak jou pi plis nan non Jezi mwen priye. Amen.

Ou se sèl latè

Idantite,

“Se sèl [ou]* ye pou moun sou latè. Si sèl la pèdi gou’l, ak kisa pou yo ba li gou ankò? Li pa vo anyen ankò. Se jete pou yo voye sa jete deyò, pou moun pile sa anba pye yo.”
Matye 5:13 HAT98 * adapte pou devosyon an

Sèl ka parèt yon bagay komen paske yo sèvi avèl sou plizyè fòm men li gen anpil enpòtans ak divès aplikasyon. Men kèk egzanp, nan kizinn, anpil mounn itilizel lè y’ap fè manje oswa prepare ak prèsève sèten pwodi tankou vyann ak anpil lòt aktivite. Manje a ka bèl jan’l vle, depil pa gen yon ti sèl brip- anpil mounn ap tou kouri kite’l sou tab la! Ou poko jwenn yon manje konsa lakay ou oswa nan restoran? Kijan’w te santi’w?

Sèl gen kalite antiseptik tou e yo itilize’l pou jere enflammasyon ak fè kèk tretman. Gen yon vèsyon sèl espesyal ki ilitize pou trete dlo pou mounn itilize pou detwi anpe mikròb. Nan peyi frèt, gen yon lòt kalite ki itilize pou fè nèj fònn vit e tè a pa glise anpil pou mounn ka fònksyone ak mwens danje, elatriye. Sèl gen anpil enplikasyon alimentè, medisinal, relijye, indistryèl, ak esperityèl tou nan anpil sosyete sou fas tè a e li konsidere kòm yon ajan pou presèvasyon ak pirifikasyon.

Sèl se yon bagay ki presye de jenerasyon an jenerasyon. Avèk konesans ak pwogrè lasyans, kounyea yo ka bay sèl anpil koulè men pandan anpil tan, sèl te konsidere kòm ” lò blan” pou enpòtans li nan kilti, ekonomi, relijyon, ak sosyete a. Pa egzanp, nan tan Women yo, sèl te itilize kòm lajan pou peye solda yo pou sèvis yo. Se la tou etimologi tèm “salarye” ki itilize jounen jodia soti.

Bib la chaje metafò paske Bondye renmen itilize eleman ke ou jwenn byen fasil nan enviwòman ou pou ede ou konprann pi byen mònn esperityèl la kote idantite ou soti nan li. Nan Matye 5:13, li revele ou se sèl tè.

“[ou]* se sèl latè; men si sèl la pèdi gou li, kijan pou’l fè’l rekouvri gou sèl ankò? Li p’ap bon ankò sof pou voye jete e pile anba pye moun.”
Matt 5:13 vèsyon BSA

Wi, ou menm zanmi ou se sèl tè a.

Ou gen kapasite pou bay “tè” a, ki se lavi, gou. Gou w’ap bay la soti nan jan ou konpòte tèt ou, simayen lanmou, lajwa, lespwa, respè, inite, jistis, lapè ak lafwa ki soti nan konfyans ak entimite ou genyen ak Bondye tout kote ou pase.

Tankou sèl, ou presye. Lide ou yo ak aksyon ou yo konte. Yon manje san sèl pa toujou gen menm valè ak apresyasion ke lè li genyen. Konsa tou mònn la ap manke “gou” san ou menm ki gen konesans de idantite’w nan Bondye e viv li nan tout sikonstans.

Ou se “lò blan” Bondye e ou egziste pou enfliyanse tout sèktè kote Bondye rele’w kit ekononik, kiltirèl, relijye, animasyon, atistitik, politik, elatriye (Kol 3:23-24; 2 Tim 2:15; Pwov 16:3). Enpak ou fè ap dire e gen plis enpòtans ke’w ka imajine (Ekl 3:11).

Pandan w’ap simayen pawòl Bondye nan konpòtman’w, kwayans ou, jan ou vanyan, pwoteje anviwònman’w, viv nan entegrite, padone, gen pasyans, e kenbe fèm nan lafwa, w’ap fè plas pou wayòm Bondye (ki se volonte’l pou chak pitit li viv byen e pote bon fwi). Asirans ou nan li malgre tout bagay k’ap pase nan sosyete a ap pwopaje limyè li sou tout fòs fènwa. Menm jan ak Habakik 2:15, ou konnen ke tout tè a gen pou’l ranpli ak glwa ak konesans Bondye (tcheke tou Ps 24:1).

Kalite “sèl” ou ye ap temanye nan mo ou chwazi yo pou pirifye ak edifye, pou kreye lavi e non kritike san sès, pèseverans ou pou’w toujou leve, ekraze logèy ou pou ou ka viv nan jenerozite ak lasante. Li ap temwanye tou nan jan’w pran swen tèt ou, abiye’w pa lafwa, e sonje kiyès ou ye.

Ou se mounn chwazi.

Ou se limyè ak sèl tè.

Tankou sèl ki ka ti grenn, gwo grenn, oswa fen, kelkeswa kijan’w ta ye jodia, wotè’w, longè cheve’w oswa’w chòv, koulè po’w, laj ou, fanmi ou ta soti ladann, ak kondisyon fisik ou, depi souf Papa ki damou’w la nan ou se pou ou pote fwi e touye move zèb ak lanmou tout kote ou pase.

Ou se yonn mounn espesyal ki ranpli ak talan.

Ou pote glwa Bondye tout kote ou pase e ou fè pati yon fanmi. Ou pa janm pou kò’w.

Ke revelasyon de idantite sa nan ou ki se “sèl” redouble fòs pou ou pa pèdi gou salè’w (lafwa’w ak fòs ou pou kontinye kwè nan Bondye e fè sa ki byen devan jan’l ak pou ede younn ak lòt). Paske Sentespri Bondye nan ou, ou pap janm pèdi gou depi’w rete atache e koze ak li.

Ke Bondye lavi a ba’w detèminasyon, vizyon, ak konviksyon pou wayòm li etabli nan kè’w ak pa chak grenn mounn ou rankontre ke de manyè dirèk oswa indirèk. Se sou kont li sèl ou ye. Apiye sou li pi plis a chak moman.

Kontinye vanse e viv nan viktwa ak otorite ou genyen nan Bondye. Ke non li egzalte nan ou ak lavi ou chak jou pi plis pou ou reyisi misyon li mete sou lavi’w yo pou glwa li!

Ann Lapriyè

Senyè mèsi pake ou chwazi’m kòm sèl tè a poum presève e simayen lanmoun otantik ou genyen pou chak grènn pitit ak kreyasyon ou yo. Pa pouvwa Sentespri, se pou mwen pozitifman enfliyanse tout kote mwen pase soti nan lakay mwen, “kizinn mwen” (panse’m, aksyon’m, konviksyon’m yo), katye’m, vil kote mwen pile, ak peyi’m pou wayòm ou etabli nan kè ak lavi nou chak. Ke volonte ou fèt sou tè sila tankou li fèt nan syèl la. Nan non Jezi. Amen.