Avèk insekirite ak move nouvèl a goch adwat, li fasil pou nou twouble men fòk nou pa bliye nou sèvi yon Bondye ki gran e li sèl ki gen denyè mo.
Ann kontinye konfese, pwofese, e kwè nan pawòl li pandan n’ap envite’l nan tou sikontans n’ap travèse nan moman sa.
Lapriyè se aksè‘n e n’ap kontinye abiye nou pa lafwa e kwè nan Bondye toupwuisan nou an! Se nan li sèl gen viktwa.
“Anvan menm yo fin lapriyè, m’ap gentan reponn yo. Anvan menm yo fèmen bouch yo, m’ap gentan ba yo sa yo mande a.”
Ezayi 65:24 HAT98
Papa ou, avan nou priye, ou gentan reponn nou. Tanpri koute kri kè nou pou delivrans peyi nou Ayiti anba fòs fènwa, vyolans, ak laperèz ak tout fanmim. Ke non ou glorifye pa pouvwa Sentespri ou e priyè nou yo egzoce pandan n’ap entèse pa mwayen Sòm 123 nan non Jezi. Nou konnen ou se yon Bondye fidèl. Nou konte sou ou e ba’w tout glwa ak lonè ou merite davans.
Som 123
Bondye gen pitye pou nou
“(1b) Ou menm ki chita sou fòtèy ou nan syèl la ap gouvènen, se bò kote ou mwen leve je mwen.
Menm jan domestik la ap gade sou mèt li, menm jan sèvant la ap gade sou metrès li, se konsa m’ap gade sou Senyè a, Bondye nou an, jouk la gen pitye pou nou.
Gen pitye pou nou, Senyè, gen pitye pou nou, paske nou sibi kont nou anba moun k’ap meprize nou yo. Moun ki alèz yo pase nou nan kont betiz.
Moun k’ap gonfle lestonmak yo sou moun ap foule nou anba pye yo.” Sòm 123:1-4 HAT98
Jan’w komanse jounen’w ap detèminen dispozisyon’w pou rès jounen. Abiman esperityèl ou necesè paske pa li Bondye ba’w “zam” pou pwoteje idantite’w nan li ansanm ak kè ou e otorite pou chanje nenpòt sitiyasyon.
“Bonjou bon Papa cheri! Mèsi paske ou asirem viktwa jodia sou tout move plan enemi nanm mwen ta vle fe pou pyejem e fem bliye kiyes mwen nan ou si’m swiv plan batay ou. Konsa pa lafwa mwen, mwen reklame viktwa sou … (fè lis kèk bagay ou panse ou ka rankontre pou jounen yan ki ka fèw bite, ouve kow pale ak moun ki damou’w anpil la!)
Mèsi paske ou raple’m ke mwen pa nan lagè ak lòt mounn mwen rankontre men fòs ak pouvwa fènwa ki vle simaye laperèz, depresyon, lamizè, ak rayisans tou patou. Pou’m preparem pou batay, pa lafwa, mwen mete sentiwon verite ya. Verite’w la, Senyè ou se yon Bondye ki san parèy. Ou tèlman renmenm ke ou te vini sou latè, ou soufri anpil, ofri tèt ou lakwa pou ou retabli koneksyon mwen ak ou e raple’m enpòtans mwen gen pou ou e jan ou renmenm malgre ou konnen tout fòs ak feblès mwen.
Ou konnen limit mwen e mwen diw
mèsi paske ou pap kite tantasyon fèm pote chay kew konnen m paka pote (1 Korent
10 :13). Laverite sou mwen yan, Senyè, se ke mwen se yon moun nouvo nan Kris e
mwen pa anba pouvwa peche ankò (2 Korent 5 :17). Mwen gen Sentespri ou ki se Lespri verite a ki ap viv nan mwen depi lèm te aksepte’w pou
sovèm ak gid mwen chak jou (Jan 14 :16-17 ; Efezyen 1 :13 ; 1 Korent 3 :16) ki
la pou gidem e kap fèm konnen lè gen yon danje tou prem. Mwen se pitit ou e
anyen paka separem avèk lanmou’w ( Women 8 :31-39 ; Sòm 32 :8 ; 2 Pyè 3 :9).
Senyè, ak lafwa mwen abiyem ak « Manto jistis la ». Bondye ou renmen lajistis e se ou ki sèl jij. Paske ou te kreye’m nan imaj ou, gidem poum fè sa ki dwat nan ze’w ak devan lèzòm ki gen kè pwòp menm lè fòs fènwa ap anvayi tout kote (Sòm 50 :6; Ezayi 11 :5, Sòm 33 :5 ; 103 :6). Ak manto jistis ou a sou mwen jodia, pa kite’m ebranle lè mechan ak fè vyolans ni fè bak, fèmen jem, oswa vinn frèt lèm wè zak malònèt k’ap fèt paske nan ou mwen gen tout otorite sou fòs fènwa poum pa kite yo pilonnen inosan e simaye laperèz kote pitit ou yo ye. Ak manto sa ki kouvrim nan mwen di non ak injistis sou tout fòm ke seswa emosyonèl, sosyal, materyèl, ou fisik ak tout zak malonèt ki vle kaba tout pitit ou yo konsa benediksyon ou va kouvri nou plis (Sòm 24 :1-6, Pwov. 2 :9 , Ezayi 56 :1). Andan manto sa map kenbe kèm ak tout emosyon mwen yo tou. Mwen pap kite kèm atache ak okenn bagay ki pa dwat ni pèmèt okenn kalite santiman negatif pran devan nan desizyon m’ap pran yo. M’ap dirije yo nan sa ki dwat ak sa ki jis. Ke limyè ou klere e non ou glorifye.
Pa pouvwa Sentespri ou, kounyea map mete nan pyem « sandal levanjil lapè ya ». Mwen disponib pou ou Bondye. Voyem kote’w vle. Dirijem vè sila yo ki bezwen ankourajman pou yo ka santi jan ou renmen yo, o yon èd fizik kelkònk. Sèvi avè’m pou’m pote lapè kote ou voye’m ki gen lagè. Ke kè poze ki soti nan ou an renye tout kote ki gen kè kase. Fè prezans mwen pote kè poze, lespwa, lajwa, ak lafwa tout kote’m pase ak sandal levanjil sa ou ban mwen an. Banm yon lapè nan lesprim ki san parèy devan pwoblèm ki vinn devanm yo e montre’m kijan poum patisipe avèw plis nan chanjman ou vle fè nan mwen e lòt pitit ou yo. Mwen pap pè ni kagou lè lenmi nanm mwen an ap simayen vyolans toupatou ak kè sote paske lavim asire nan ou e pwogram lavi nou chak se nan ou yo ye.
Kounye ya map pran « boukliye lafwaa », Senyè. Lafwa’m nan ou e nan ou menm sèl. San ou, mwen pa ka fè anyen e avèk ou, mwen ka fè tout bagay. Okenn tantasyon k’ap vini sou mwen paka travèse men ou kote’m abrite nanm mwen, kè’m ak lespri’m. Nan ou mwen byen antoure chak moman pandan jounen an e mwen itilize defans sa ki se konfyans mwen genyen nan ou pou pwoteje’m kont tout atak Satan. Avèk ou, mwen pa pè anyen paske w’ap fè wout avè’m jodi ya. Lè’m santi dout oswa laprèz, nève, enpasyans, oswa lòt tantasyon ta vle parem, mwen deklare viktwa m sou yo an avans nan non Jezi!
Senyè, Mèsi pou « Kas sali sa » mwen ap mete kounyea! Ou konnen kijan Satan ap chaje lesprim lajounen tankou lannwit ak move lide, dout ak pèrèz. Mwen mete kas sa poul pwoteje lespri’m. Sa ka rive ke mwen santi frap yo men lè sitiyasyon kontraryan oswa resilta mwen ta vle yo mwen poko jwenn yo, men anyen pa ka travèse kask sa a ki se pwoteksyon m nan ou e mwen resevwa pouvwa ou nan mwen. Mwen chwazi mete yon fren nan tout vye panse ki ka rive nan pòt lesprim. Avèk kas sali saa, panse sa yo pap gen okenn swit. Mwen chwazi pran dwam sou tout sa m’ap panse ak tout mo k’ap soti nan bouch mwen paske mwen kwè nan tout pwomès ou fè sou lavim ak sou lavi tout pitit ou yo. Mwen pap atachem ak anyen ki mal e ak santiman ak aksyon ki pa fè’w plezi tankou jalouzi, rayisman, plenyen, tripotray, panse negatif, tristès, perèz ak desespwa, e latriye. Pa pouvwa Lesentespri ou a jodia mwen chwazi mete tout enèjim sèlman sou sa ki bon, ki dwat e ki fèw plezi (Fil 4:7-8).
Ak tout konfyans mwen gen nan ou m’ap pran “epe lespri ya” ki se pawòl ou yo. Mèsi pou kado san parèy sa! Se yon bagay ki gen anpil fòs ak pouvwa poul kraze menm pi gwo atak Satan ka fè yo. Ou di nan pawòl ou yo ke mwen pa anba dezi kò ak emosyon mwen yo poum obeyi yo. Pawòl ou di tou mwen pa anba pouvwa Satan pou’m fè volontel paske Sentespri ou ki nan mwen fò pase lespri mond lan (1 Jan 4:4). Konsa, pa lafwa mwen pran epe lespri solid sa ki plen pouvwa saa ke Sentespri ban mwen, ki gen pouvwa pou’l defann mwen lè lenmi yo atakem, banm rekonfò nan moman detrès, enstwim nan moman meditasyon, e genyen batay la sou tout pouvwa fenmwa pou lòt mounn yo ki pote konnen e ki bezwen konnen verite ki soti nan ou yo pou yo ka jwenn libète pa yo tou e jwi de viktwa ak otorite sa mwen gen nan ou.
Senyè, Se pou lapriyè m moute devan ou tankou lansan y’ap boule pou ou a! Wi, se pou lè m leve men m pou m lapriyè, se tankou ofrann yo fè pou ou chak jou. Mèsi paske ou chwazim kòm pitit ou poum reprezante’w sou tè sila. Se pou satan ak kolòn li yo trample lè yo wè jan glwa ou ap manifeste andanm e nan lavi mwen ak tout lòt pitit ou yo nan non Jezi. Amen
“Pou fini, chache fòs nou nan lavi n’ap mennen ansanm ak Senyè a ak nan gwo pouvwa li.Pran mete sou nou tout kalite zam Bondye ban nou pou nou ka kenbe tèt anba riz Satan. Paske, se pa ak moun nou gen pou nou goumen. Men, se ak move lespri ki nan syèl la, ak chèf, ak pouvwa, ak otorite k’ap gouvènen nan fènwa ki sou latè a. […] Resevwa pouvwa Bondye k’ap delivre nou an tankou yon kas an fè nan tèt. Pandan n’ap fè tou sa, pa janm bliye lapriyè. Mande Bondye konkou li. Lapriyè nan tout sikonstans avèk pouvwa Sentespri a.Se poutèt sa, pa kite dòmi pran nou, kenbe fèmnan sa n’ap fè a. Lapriyè pou tout pèp Bondye a.” Efezyen 6: 10-18
Lè yon mounn pral kote ki gen anpil sekirite oswa ta rankontre mounn ki gen anpil pouvwa sou tè sa tankou yon prezidan oswa yon mounn nan fanmi wa yo tankou rèn Angletè a fòk li gen yon relasyon kole ak yo ak yon pozityon espesyal ki pou ba li gwo privilèj sa. Aksè sa ka vini sou fòm yon kat oswa, yon lèt envitasyon,etc. Konsa tou pou nou aksede Bondye nou an ki pi wo pase you tout nou bezwen aksè tou sèlman Bondye baw pase ak li san patipri e nenpòt mounn ou ye kelkeswa ran sosyal ou ka jwenn ak li e aksè sa nou jwenn li pa lapriyè (Efez 6:17-18).
Lapriyè se yon kominikasyon entime ak Bondye koute ou ap pale ak tout kèw. Ou pa bezwen di mil mo ni santi fòk ou pafè pou pale ak Bondye paske li damou ‘w anpil (Jan 3:16). Lapriyè se tankou yon konvèsasyon ant de bon patnè kote youn alèz anpil e lòt la konnen nenpòt ti erè li ta fè li pa bezwen pè pale de sa ak li paske l’ap konprann e l’ap ede li. Matye 6: 5-7, ede nou ke lapriyè nou yo fèt nan yon moman entime e ak dwe fèt ak tout kèn. Nou lapriyè ak bonnanj nou pou baw Bondye glwa pa pouvwa Sentespri li ki nan nou e ak lespri nou tou (1 Korent 14:15).
Paske Sentespri toujou la ak nou, nou ka lapriyè nenpòt moman lajounen kou lannwuit e itilize pawòl Bondye yo nan Bib la pou ogmante fòs priye nou yo( Ezayi 41:10; Ef 3:16; Women 8:26; Matv28:20). Lapriyè se kle ki kase tout chèn e se yon nan pi gwo zanm Bondye pa nou paske lagè pa nou an pa fèt ak katouch ak vyolans men sou de jenou nou ak obeyisans nou lè Bondye ba nou yon direksyon e nou obeyi nou fèl pandan n’ap patisipe nan tout lwa k’ap pwoteje dwa imen ak sa ki pa gen defans yo (Miche 6:8).
12 rezon pou ou Lapriyè
Pou di Bondye mèsi pou tout sa li te fè, ap fè, e ap kontinye fè nan lavi ou ak lavi tout pitit li e fè lwanj ak konpliman pou li (Kol 4:2; Sòm 63, 134, Efezyen 1:16; Fil 1:4; 1 Tim 4:5, Kol 1:3; 1 Tes 1:2)
Pou nanm ou ak tout lavi’w pwospere ( Sòm 1:1-3; 1 Wa 2:3; Det 2:7, 8:18; 3 Jan 1:1-2, Lik 6:28)
Pou mande Bondye padon pou pechew yo ak peche frèw ak sèw yo ak yon kè ki pi e gen anpil lanmou paske ansanm nou pi fò ( 1 Korent 14:14; Jòb 16:17; 1 Sam 15:25; 2 Kwonik 6:21-29; 2 Kwonik 30:20; JaK 5:15)
Tande vwa ak konprann volonte Bondye pou lavi pa’w chak jou (1 Wa 22:5; 2 Kwonik 18:4; Chirasid 7:10; Efezyen 6:18)
Jwenn direksyon pou lavi ou ak nenpòt desisyon ou dwe fè(Jeremi 42:3; Sòm 119: 108; Sajès 7:7; Women 8:26; Mak 11:24)
Pou delivrans, pwoteksyon, ak sekou pou ou menm, fanmi’w, zanmiw’w, katye’w ak peyi ou (Sòm 86, 88, 91, 102, 119:170; Esdras 8:23; Women 15:31; Matye 5:44; 2Kwonik 32:20; Neyemi 4:9)
Pou mande Bondye tout bezwen w yo e rakontel tout ti sekrè ak dezi kè‘w yo- se li sèl ki ka fè yo vinn realite (Fil 4:6; Matye 21:22; Pwovèb 16:18)
Pou rete fèm e pa tonbe nan tantasyon ni sou pouvwa fòs fènnwa (Mak 14:38; Lik 18:1; Lik 22 : 40-46; 2 Kwonik 6:35-39; Lik 6:28; 1 Korent 10:13)
Defann kòz ou devan jij siprèm ou an ki gouvènen ak jistis e ak entegrite ( 1 Wa 8:49; Jòb 8:5; Det 32:4; Sòm 18, 62; 1 Pyè 2:23)
Pou fòs ak kouraj pou kontinye grandi nan lafwa ak plis lanmou nan ou (Kol 1:11; 2Korint 13:9; Sòm 10:17)
Pou gerison maladi ou yo ak mounn kote ou pase (Chirasid 38:9 , 2 Kwonik 7:14, Sòm 41, 147, Jeremi 17:1;Jak 5: 13-16; 1 Pyè 2:24; Jak 5:13-16; Ezayi 38:16-17; Mak 16: 17:18)
Pou Bondye voye plis disip pou fè travay wayòm li an sou tè a (Matt 9:35-38, Lik 10:2)
Lagèw
Anba
Pouvwa
Resireksyon ak lanmou
Infini
Yaweh
Ènmi’w yo detwi deja!
Benediksyon: Senyè, “Se pou lapriyè m moute devan ou tankou lansan y’ap boule pou ou a! Wi, se pou lè m leve men m pou m lapriyè, se tankou ofrann yo fè pou ou chak swa a. Senyè, mete yon mò nan bouch mwen. Veye pawòl k’ap sòti nan bouch mwen! Pa kite move lide pran tèt mwen. Pa kite m mete tèt ansanm ak mechan yo nan mechanste yo. Pa kite m patisipe nan fèt yo!” Sòm 141:2-4 HAT98. Ke volonte ou fèt e non ou manifeste chak jou nan mwen e tout kote lòt pitit ou yo avèm pase. Amen.
“Pou fini, chache fòs nou nan lavi n’ap mennen ansanm ak Seyè a ak nan gwo pouvwa li. Pran mete sou nou tout kalite zam Bondye ban nou pou nou ka kenbe tèt anba riz Satan. Se poutèt sa, depi koulye a, pran tout zam Bondye bay yo. Konsa, lè move jou a va rive, n’a ka kenbe tèt ak lènmi an. Lè batay la va fini nèt, n’a kanpe la byen fèm nan pozisyon nou toujou. Pare kò nou: mare verite a tankou yon sentiwon nan ren nou. Pwoteje nou ak jistis Bondye a tankou plak pwotèj sòlda yo mete sou lestonmak yo pou pwoteje yo.[….] Resevwa pouvwa Bondye k’ap delivre nou an tankou yon kas an fè nan tèt nou. Asepte pawòl Bondye a tankou yon nepe Sentespri a ban nou” Efezyen 6:10-17
Anpil mounn gen konfyans nan zanm oswa relazyon pou sekirite yo men tout konnen gen de sityasyon ou trouve’w pa gen lajan ni relasyon oswa doktè ki gen solisyon an.
Nan Bondye nou gen yon defans solid ki sèvi tankou yon epe espirityèl ki se pawòl li ke pèsòn paka brise ata Satan ak tout kolòn li yo pè lè nou itilize li li byen! Yon epe oswa yon manchèt espirityèl represente pouvwa, kouraj, otorite, ak defans. Menm nan fason pratik kote yon mounn ka itilize manchèt pou pwoteje tèt li nan yon atak fizik, oswa kiltive latè, netoye zèb elatriye konsa tou manchèt esperytyèl nou an ka koupe tèt move lawon Satan yo ak Satan li menm, netoye nanm nou, pwoteje ak enstwi nou nan moman necesè yo.
Paske nou pa ka ale nan lagè san defans, Pòl ankouraje nou pou nou “aksepte pawòl Bondye a tankou yon epe Sentespri a ba nou”. Sa vle di pou nou pran tout otorite, aksè, ak pouvwa pawòl Bondye ki soti nan Bib la ba nou. Se sèl pati abiman esperityèl tout kretyen ki vyolan paske li enpòtan e se li ki pi pwisan.
Bib la ekplike nou ke “Pawòl Bondye a gen lavi, li gen pouvwa. Li pi file pase kouto de bò. Li koupe jouk li jwenn kote nanm ak lespri moun fè yonn, jouk kote vyann ak mwèl zo kontre. Li jije tout santiman ak tout lide ki nan kè moun” (Ebre 4:12).
Sa vle lè ou pase tan nan li Bib la e aplike pawòl Bondye nan lavi’w pa konprann sa mov le di, nan ki context yo aplike ak kijan ou ka aplike yo nan lavi w chak jou, w’ap realize ke gen pouvwa pou chanje lavi’w, chanje anviwòmanw, change atmosfè politik peyi’w ak kè dirijan yo, delivre fanmi’w, restore maryaj oswa relasyon ak pitit ou zanmi ou yo, chase tout move demon ak malady, fè bèbè pale, soud tande, etc pa pouvwa Sentespri Bondye a ki nan ou. Se pa ti mèvèy Sentespri Bondye ka e vle fè nan ou e atravè ou lè ou itilize pawòl Bondye sou tout sikonstans nan lavi’w!
Yonn nan predikatè
mwen renmen tande anpil Tony Evans, explike ke epe sa ke Sentespri ba ou a pa tankou
gwo manchèt long mounn yo konn pati ak yo pou ale nan jaden oswa lagè men se
tankou yon ti kouto pòch ou ka sèlman itilize lè enmi an tou devan ze’w la (zan
gran paran nou konn li lè li bab pou bab avèw!). Lè gen yon atak oswa ofans sou
lavi’w, kè’w, lapè w, sekirete’w ak fanmi’w elatriye e Satan ap tante’w pou ta
fè’w pèdi lafwa’w nan Bondye oswa nan fiti li gen pou ou a.
Satan pa renmen tande pawòl Bondye men se li sèlman li pè. Ou ka itilize tout vokabilè ou konnen pou ou fè li pè men li sèlman tranble lè pitit Bondye yo itilize pawòl Bondye sou li. Jezi te itilize taktik sa lè Satan t’ap tante’l nan dezè a pou li aprann nou jan pou nou goumen ak li a travè sikonstans lavi a nan Matye 4:3-4, ak Lik 4:4-12. Lè Jezi resite Det. 8:3 bay Satan enmi sa te reponn Jezi ak Sòm 91:11-12.
Olye pou Jezi ale nan diskou avèl e Jezi te kontinye reponn li “Men sa ki ekri” e li kontinye ak Det 6:16. Lenmi nanm nou an konnen pawòl yo tou se sak fè fòk ou asire’w ou fè devwa’w pou byen konprann sa w’ap di li yo e pou ou di yo ak otorite e ak lafwa. Itilize pawòl Bondye yo ak respè e ak lafwa, chache vèsè ki gen rapò ak sikonstans nan lavi ou ak peyi e komanse envite wayòm Bondye a tout kote ou ye ak pawòl li lè atak yo ap vanse sou ou. Kote ki gen lagen ou gen pouvwa pa recite pawòl Bondye yo sou lapè pou reklame lapè paske kote ou ye Bondye la paske ou se pitit (Matye 28:20).
Ann aprann sa ki ekri nan Bib la sou sikonstans nou yo pou
nou di dyab la jan ti chante timounn ki konn fè lago te konn di “madigra m pa
pè’w!” paske nan Bondye nou gen batay la deja.
Ann Lapriyè: “Senyè mèsi pou pawòl ou yo
ak mizèrikòd ou gen pou mwen! Mèsi paske ou pa janm kite mwen san defans e nan ou
mwen pap janm manke anyen. Ak tout konfyans mwen gen nan ou m’ap pran epe
lespri ya ki se pawòl ou yo. Mèsi pou kado san parèy sa! Se yon bagay ki gen
anpil fòs ak pouvwa poul kraze menm pi gwo atak Satan ka fè yo. Ou di nan pawòl
ou yo ke mwen pa anba dei kò mwen yo, emosyon poum obeyi yo. Pawòl ou di tou
mwen pa anba pouvwa Satan pou’m fè volontel paske Sentespri ou ki nan mwen fò pase lespri Mond lan (1 Jan 4:4). Konsa, pa
lafwa mwen pran epe lespri solid sa ki plen pouvwa saa ke Sentespri ban mwen, ki gen pouvwa pou’l defann mwen lè lenmi yo
atakem, banm rekonfò nan moman detrès, enstwim nan moman meditasyon, e genyen
batay la sou tout pouvwa fenmwa pou lòt mounn yo ki pote konnen e ki bezwen konnen
verite ki soti nan ou yo pou yo ka jwenn libète pa yo tou e jwi de viktwa ak
otorite sa mwen gen nan ou. Amen!!
« Pou fini, chache fòs nou nan lavi n’ap mennen ansanm ak Seyè a ak nan gwo pouvwa li. Pran mete sou nou tout kalite zam Bondye ban nou pou nou ka kenbe tèt anba riz Satan. Paske, se pa ak moun nou gen pou nou goumen. Men, se ak move lespri ki nan syèl la, ak chèf, ak pouvwa, ak otorite k’ap gouvènen nan fènwa ki sou latè a. Se poutèt sa, depi koulye a, pran tout zam Bondye bay yo. Konsa, lè move jou a va rive, n’a ka kenbe tèt ak lènmi an. Lè batay la va fini nèt, n’a kanpe la byen fèm nan pozisyon nou toujou. Pare kò nou: […….] Toujou pran konfyans nou gen nan Bondye a tankou yon defans ki va penmèt nou pare tout flèch Satan an ap voye tou limen sou nou. Resevwa pouvwa Bondye k’ap delivre nou an tankou yon kas an fè nan tèt nou. »
(Efezyen 6 :10-16)
Kas se pwoteksyon pou sèvo nan tèt nou ki se pati ki pi frajil nan kòw. Lè timounn ap aprann monte bekann, anpil paran mete kas nan tèt yo pou si yi tonbe pou tèt yo pa kase. Konsa tou lè chofè moto ap kondwi yo ta sipoze mete kas nan ka ou ta gen yon aksidan pou yo pwoteje. Ou pa bezwen doktè oswa filosòf po’w konnen, yon tèt san kò pa vo anyen alò kas la ki pou pwoteje li enpòtan.
Solda jodia yo menm jan ak sa nan tan Woman yo mete kas an fè (bagay ki lou epi solid) konsa pou lavi yo ta konseve si enemi yo ta vize wo sou yo ak nenpòt flèch oswa kouto pou yo pa peri. Paske nou toujou nan lagè espirityèl ak Satan ansanm ak kolon li yo, fòk lespri nou byen pwoteje tou kont tout move atak li ta vle fè sou nou. Lèw’ap mete tout zam Bondye ba ou pa lapriyè fok ou mete kas ou tou paske atak yo ap vini sou do pye’w kan menm. Poutèt sa apot Pòl invite ou resevwa pouvwa Bondye ki nan ou a tankou yon kas pou pwoteje “tèt” ou (lespri, nanm, ak kè ou). “Pouvwa” sa pa yon bagay ou ka genyen ak fòs, riz, abi, oswa mechanste men ki soti nan konviksyon ou genyen nan kiyès Bondye ye, bonte ak fidelite li, e nan relasyon nou genyen ak li. Depi ou resevwa Jezi kom sovè ‘w, Sentespri li abite nan ou (ki fèw gen pouvwa Bondye a nan ou ki pou delivre’w nan tout move sikonstans ak pyèj dyab la ta vle fèw pèdi konfyans ou nan Bondye ak nan tèt ou) e ou sove pa lafwa (1 Korint 3:16; 6:19; Ezekyel 36:27; 1 Jan 2:27; Efezyen 2:8).
Lè ou mete kas sali (resevwa pouvwa Bondye e dakò ak sa li vle fe nan lavi’w e avè’w), ou bay Lesentespri plas pou gide ou. Konsa ou mande Bondye pou li retire nan ou tout distraksyon ak move lide ki ka enpeche ou fè travay li byen ak viv yon fason k’ap reflekte glwa li. Li enpòtan pou sonje ke nan Bondye lavi ou asire e ou se youn nan pi bèl diaman ki nan kouronn li chak jou (Zachari 9:16). Li damou’w pi plis ke tout lòt kreati sou latè e li pap janm sispann renmen’w (Jeremi 31:3); se pou tèt sa li bay vi li sou kwa kalvè pou demontre lanmou’l pou ou e asire’w lavi etènèl (Jan 3:16). Ou ka fèl konfyans!
Menm jan solda pa ale nan lagè san kas li, pa bliye invite pouvwa Bondye ki se Sentespri li ki abite nan ou ki se disip Kris (Lespri ki konn tout bagay, ki ka pwoteje’w, gide’w, konsele’w, transfòme kè’w ak enviwonman’w nan yon segond; Travay 1:8-10) pou pase jounen an avè’w. Jezi sove’w e lavi ou restore nan li. Sa vle di nan li ou gen pou ou ale de viktwa an vitkwa pandan w’ap apwofondi relasyon ou menm avè’l. Lè ou finn mare sentiwon verite a nan ren ou; mete manto jistis Bondye a sou ou ak sandal levanjil lapè a pou anonse bòn nouvèl lanmou Bondye a nan pyè’w; pase boukliye lafwa ou k’ap fè ou viv ak kè poze; pa bliye pase menm pran kas sali ou a ki pou pwoteje lespri’w kont tout move lide ak pèsepsyon ki pa fonde nan Bondye ki ta vle fè lafwa’w twouble nan non Jezi. Gade kijan’w chèlbè non lèw abiye’w konsa!!! Satan gonfle la lè li wè jan ou konn abiye e jan ou ap ankre idantite’w plis nan Bondye pou ou ka wè tout plan li yo egzose nan lavi’w! Pa okipe’l. Li pèdi bagay la deja. Jou l’ap konte pou wayom li an detwi nèt. Viktwa a se pou ou li ye. Kontinye vanse bon solda lanmou!
Ann Lapriyè ansanm pou mete kas sali a
Senyè, pa lafwa m’ap resevwa pouvwa ou nan mwen tankou yon kas k’ap pwoteje nanm mwen. Mèsi pou « Kas sali sa »! Ou konnen kijan Satan ap chaje lesprim lajounen tankou lannwit ak move lide, dout ak pèrèz. Mwen mete chapo saa poul pwoteje lespri’m. Sa ka rive ke mwen santi frap yo men lè sitiyasyon kontraryen oswa resilta mwen ta vle yo mwen poko jwenn yo, men anyen pa ka travèse kask sa a ki se pwoteksyon m nan ou e mwen resevwa pouvwa ou nan mwen. Mwen chwazi mete yon fren nan tout vye panse ki ka rive nan pot lesprim. E avèk chapo sali saa, panse sa yo pap gen okenn swit. Mwen chwazi pran dwam sou tout sa m’ap panse ak tout mo k’ap soti nan bouch mwen paske mwen kwè nan tout pwomès ou fè sou lavim ak sou lavi tout pitit ou yo. Mwen pap atachem ak anyen ki mal e ak santiman ak aksyon ki pa fè’w plezi tankou jalouzi, rayisman, plenyen, tripotray, panse negative, tristès, perèz ak desespwa, e latriye. Pa pouvwa Lesentespri ou a jodia mwen chwazi mete tout enèjim sèlman sou sa ki bon, ki dwat e ki fèw plezi (Fil 4:7-8). Mèsi paske ou sove nanm mwen e ba mwen lavi k’ap dire pou tout tan an. Amen.
« Pou fini, chache fòs nou nan lavi n’ap mennen ansanm ak Seyè a ak nan gwo pouvwa li. Pran mete sou nou tout kalite zam Bondye ban nou pou nou ka kenbe tèt anba riz Satan. Paske, se pa ak moun nou gen pou nou goumen. Men, se ak move lespri ki nan syèl la, ak chèf, ak pouvwa, ak otorite k’ap gouvènen nan fènwa ki sou latè a. Se poutèt sa, depi koulye a, pran tout zam Bondye bay yo. Konsa, lè move jou a va rive, n’a ka kenbe tèt ak lènmi an. Lè batay la va fini nèt, n’a kanpe la byen fèm nan pozisyon nou toujou. Pare kò nou: […….] Toujou pran konfyans nou gen nan Bondye a tankou yon defans ki va penmèt nou pare tout flèch Satan an ap voye tou limen sou nou. »
(Efezyen 6 :10-15)
Konfyans nan Bondye oswa lafwa se younn nan defans ki pi enpotan ou genyen (Efezyen 6 :15). Li ede’w kanpe e pa panike lè lavi vle fè vant ou balonnen (Pwovèb 3 :5-6). Li raple’w ke fiti ou asire e ou pa bezwen bougonen. (Sòm 46 :10) ; 1 Cor 16 :13 ; Woman 5 :1-3; Jeremi 29:11)
Lafwa ba’w asirans menm lè tout bagay fè nwa, w’ap toujou gen delivrans (1 Korent 2 :5) Paske anyen pa enposib pou Bondye ou a ki san parèy e ki pa janm nan pretans (Ebre 11 :1-6, Lik 1 :37). Depi’w kwè nan tout sa Bondye di, kont Satan ou pap janm san defans (Matye 21 :22).
Lafwa pwoteje’w kont atak lenmi nanm ou an ki ta vle tout tan ou gen domi nan je’w Konsa san w pa rann ou kont li gentan mete anpil kòd ak pèlen nan pye’w (Ef 6 :10-16). Lè’w kite lafwa gide’w ou dezame dout, tristès, plenn, perèz, ak doulè ki ta vle toumante’w (1Pyè 5 :7-10).
Lafwa’w manifeste lè’w chwazi pou’w pwoteste kont mechanste ak kalimite E ranplase panse negatif yo ak pawòl Bondye paske na li gen tout verite. Poutèt sa, pa bliye mete defans ou pou pwoteje nanm ou, kè’w ou ak lespriw lè wap abiye.
Lè ou komanse pi sinsè nan pare tèt ou (oswa figuratif man kò ou jan Pòl te di a) pou ou grandi nan lafwa, Pare’w tann atak Satan paske li toujou ap voye tout « flèch » oswa kalamite sou ou pou’w ka febli e pedi lespwa. Paske li vle’w pa asire idantite’w nan Bondye tout bon men kenbe fèm lafwa ou genyen an nan Bondye sèlman (Jak 1 :5-6 ; Women 1 :17).
Jan granmounn lontan konn di « Baton’w nan men’w, pa kite chen manje’w. » Pa bay Satan espas vid pou envayi kèw ak Lespri’w. Ou pa pou kò’w ni ou pap janm pouko paske w’ap sèvi yon Bondy eki vivan tout Bon e ki ave’w tout kote’w pase !
Lapriyè Pou mete Defans oswa Boukliye Lafwa a :
“ Papa doudou, mèsi pou jan ou bon mwen. Ou tèlman renmen’m a ta janm abiye’m esperityèlman chak jou konsekan pou ou! Ou konnen joumou pa janm donnen kalbas e ou pa janm kite kèm tankou tè ki rete san wouze. Mèsi pou sentiwon verite ou a ki banm fòs chak jou, manto jistis ou a ki edem rete onèt ak tèt mwen e ak lòt mounn konsa m pa fèmen de jem lè’m wè abi ap fèt kotem ye. Ak lanmou ou ban mwen, mwen kenbe nan pye mwen sandal lapè ou a pou’m pataje bon nouvèl ou ak kè poze tout kote mwen pase.
Kounye ya map pran « boukliye lafwaa », Senyè. Lafwa’m nan ou e nan ou menm sèl. San ou, mwen pa ka fè anyen e avèk ou, mwen ka fè tout bagay. Okenn tantasyon k’ap vini sou mwen paka travèse men ou kote’m abrite nanm mwen, kè’m ak lespri’m. Nan ou mwen byen antoure chak moman pandan jounen an e mwen itilize defans sa ki se konfyans mwen genyen nan ou pou pwoteje’m kont tout atak Satan.
Avèk ou, mwen pa pè anyen paske w’ap fè wout avè’m jodi ya. Lè’m santi dout oswa laprèz, fristrasyon, enpasyans, oswa lòt tantasyon ta vle parem, mwen deklare viktwa m sou yo an avans nan non Jezi ! Ou pwomèt viktwa ak tout moun ki mache selon pawòl ou e ki kache yo nan ou. Konsa nan lafwa, map deklare viktwa’m kounye ya menm paske mwen konnen gen anpil flèch tou limen ke Satan ap voye sou chemenm menm pandan moman sa m’ap priye’w laa. Ou konnen tout sa ki pou rive’m jodia e ou ban’m viktwa sou tout fòs fènwa. Mèsi anpil pou sa! Ke lafwa’m kontinye grandi nan ou pi plis pou relasyon mwen ak ou pi sere chak jou konsa m’a kontinye fè lwanj ou e temwanye grandè ou tout kote mwen pase. Amen.
« Paske, se pa ak moun nou gen pou nou goumen. Men, se ak move lespri ki nan syèl la, ak chèf, ak pouvwa, ak otorite k’ap gouvènen nan fènwa ki sou latè a[…..]Pare kò nou: mare verite a tankou yon sentiwon nan ren nou. Pwoteje nou ak jistis Bondye a tankou plak pwotèj sòlda yo mete sou lestonmak yo pou pwoteje yo. Pou soulye nan pye nou, mete aktivite pou anonse bon nouvèl k’ap fè moun viv ak kè poze a. » Efezyen 6 :12-15
Lapè oswa kè poze se yon bagay nou toujou bezwen e Bondye ban nou li an abondans lè nou konfye’n nan ak tout kè’n.
Sonje nan Bondye, idantite’w se lapè e li fè pati nan defans Bondye ba ou pou’w konbat lenmi nanm ou an chak jou. Ak dechoukay pasi pala, manifestasyon a goch a dwat, kalimite ak vyolans nan yonn bagay « peyi bloke » li pa fasil pou sonje ke ou se lapè e mete’l nan abiman espirytèl ou nan lapriyè. Tout pwoblèm sa yo se w’ap rankontre nan enviwònman ou chak jou raple ke li necesè pou’w ‘mete ‘ sandal levanjil lapè a paske enemi ou (Satan ak tout espri ki fè alyans ak li yo) tout sa li vle se volè (lapè, lajwa, lasante, lafwa, lavi), touye (rèv ou, siksè’w, vizyon’w yo, imaj ou genyen positif de tèt ou ak lòt mounn), e detwi (tout sa ki bon nan ou ak nan antouraj ou) Jan 10 :10. Ou nan ‘lagè’ chak jou (Efezyen 6 :10-18) alò ou pa ka mache pye atè menm jan yon solda nan tan nou an pa janm pati san gwo bòt nan pye yo pou yo pwoteje tèt yo de tout pyèj gwoup lenmi an ta poze pou yo.
Lè Pòl tap dekri abiman esperityèl yon disip Jezi, 3èm konsèy la sete « mete aktivite pou anonse bon nouvèl k’ap fè moun viv ak kè poze a » (Ef 6 :15). Anpil lòt vèsyon Bib la dekri li tankou « Sandal Levanjil lapè a » ki ede nou wè kisa aktivite sa yo ye (moveman, deplaseman alò fonn gen bagay nan pye) e sa montre nou tou enpòtans kè poze a nan lè n’ap bòn nouvèl la ki se lanmou Bondye genyen pou ou ak tout lòt moun ki sou latè kelkeswa nasyonalite li, koulè pol ak fòm tèt li.
Nou pa nan goumen yonn ak lòt men avèk fòk fènwa alò nou dwe gen lapè pou nou pataje pawòl Bondye a ansanm. Bondye tèlman vle pitit li yo gen kè poze, plizè kote nan Bib la avan li menm oswa zanj li yo pale komandman pou gen kè poze a toujou la( Jij 6 :23 ; Lik 1 :28 ; Lik 7 :50 ; Jan 14 :27 ; Jan 20 :19-26 ; 1 Pyè 5 :14).
Bon, kisa sa vle di menm pou mete sandal levanjil lapè nan pye’w? Kesyon ou an excelan! Ann gade ansanm. Lè ou gen bon sandal nan pye’w (oswa solye siw vle), nenpòt pikan pa ka pike’w ni labou nwaje pye’w. Ou ka mache sou zèb oswa wòch (lapli ni solèy pa fè’w pè) e pye’w yo proteje kont kèk mikrob ak bagay ki ka blese’w. Konsa tou lè’w mete sandal levanjil lapè nan pye’w apre ou vinn mare a sentiwon verite na ren ‘w a ak manto jistis Bondye a sou ou, ou dispoze nanm ou, kò’w ak lespri’w pou simaye lanmou Bondye tout kote ou pase ak anpil sajès ak entegrite.
Ou mete tèt ou nan lòt disposisyon pou ou renmen mounn kelkeswa jan yo parèt (Matye 5 :47) sou ou e ou konsakre tout deplasman ou fè yo a Jezikri paske plan lavi ou Bondye trase’l deja (Jaremi 29 :11). Lè ou fè sa, ou mete tèt ou nan pozisyon pou Bondye manifeste glwa li nan ou e a travè de ou pi plis.
Ak sandal levanjil lapè a nan pye’w (dispozisyon lanmou ak kè poze a ki soti nan konfyans ou genyen nan Bondye) ou pare tou pou konbat lenmi nanm ou an e entèsede pou fanmi’w ak peyi’w nan lapriyè ak de pye’w sou tè a sanw pa febli paske ou pwoteje e ou konn kiyès Bondye ye ak idantite ou nan li.
Konsa lè gwo van lavi ap soufle sou ou yon jou e ou santi fòs vle kaba, wa sonje kote lapè ak fòs ou soti e pataje menm kouraj ak lanmou sa ak lòt moun paske mwayen ki pi efikas pou pataje levanjil lapè sa se lè ou sèvi Bondye ak tout lavi’w (konpòtman w- janw reponn ak kalamite e kè kontan, itilize talan ou yo ak tan’w, riches ou, jan’w sèvi ak tèt ou zanmi w yo ak fanmi’w, mounn ki nan travay ou, legliz ou, enviwònman’w ak otorite nan peyi’w ansanm ak tout pawòl ki soti nan bouch ou etc.) e kanpe pou sa ki dwat( jistis ak verite ki soti nan pawòl Bondye yo, lè ou pa rete silans lè ou wè injistis ap fèt etc).
Alòs ou konprann kounyea jan sandal levanjil lapè a enpòtan ? Pa soti san sandal sa yo nan pye’w paske lè’w san defans nenpòt chen ka jape’w (atak esperytèl sou tout fòm) e ou pap ka kouri al kache byen paske ‘pye’w ‘ (lespri’w ak kèw) pa byen pwoteje.
Ann Lapriyè Pou Abiye Nou ak mete Sandal Levanjil
Lapè:
Pa pouvwa Sentespri ou, kounyea map mete nan pyem « sandal levanjil lapè ya ». Mwen disponib pou ou Bondye. Voyem kote’w vle. Dirijem vè sila yo ki bezwen ankourajman, santi jan ou renmen yo, oubyen yon èd fizik kelkònk. Sèvi avè’m pou’m pote lapè kote ou voye’m ki ka gen lagè. Ke kè poze ki soti nan ou an renye tout kote ki gen kè kase ak vyolans paske lapè bay se sèl ki ap dire e mwen konnen ou vle restore lapè nan lavi nou chak. Fè prezans mwen pote kè poze, lespwa, lajwa, ak lafwa tout kote’m pase ak sandal levanjil sa ou ban mwen an.
Banm yon lapè nan lesprim ki san parèy devan pwoblèm ki vinn devanm yo e montre’m kou man poum paticipe avèw plis nan chanjman ou vle fè nan mwen e lòt pitit ou yo. Mwen pap pè ni kagou lè lenmi nanm mwen an ap simayen vyolans toupatou ak kè sote paske lavim asire nan ou e pwogram lavi nou chak se nan ou yo ye. Mèsi anpil pou priyè sa ou koute e mwen konnen ou ap egzose li. Ke non ou glworifye Jezi, Amen.
